無綫台慶頒獎禮將於下月4日舉行，黎耀祥憑《巾幗梟雄》柴九一角競逐視帝呼聲甚高，昨日他與無綫總經理陳志雲齊齊出席開幕活動，全程獲陳總寵幸，更獲邀講述一段關於頒獎禮的歷史。雖然陳總堅持不透露視帝、視后的心水，不過言談間重申是否親生仔與獎項冇關，更力讚祥仔表現出色。
黎耀祥昨日與無綫總經理陳志雲、李珊珊和黃伊汶等在紅磡出席模特兒公司開幕活動，祥仔更獲陳總寵幸，不但全程陪伴左右，訪問過後更邀祥仔午膳，陳志雲還透露找祥仔講述一段關於頒獎禮的歷史，經剪輯後在他的blog播出。
「唔會親疏有別」
祥仔被記者指地位超然，他謙虛地說：「我只係叨佢光啫！好多藝人都喺佢身邊出現。」問到祥仔有否被陳志雲的誠意打動而簽約？他說：「佢一直都冇搵過我傾，不過我覺得呢個唔係問題，最緊要係兩者取得合作平衡。」
在旁的陳志雲認同說：「係咪親生仔女根本同攞獎冇關，以前蔡少芬、歐陽震華同夏雨都唔係親生仔女，佢哋咪一樣有獎攞！我哋唔會親疏有別，只係合作形式唔同啫，大家都係幫公司。」問到陳志雲對今年視帝、視后的人選，他說：「梗係唔講得，個個表現都好出色，留番事後先講。」至於信心方面，祥仔說：「好似買六合彩一樣，期期有買唔一定會中，我係恨攞但未必中，總之我冇壓力。」
珊珊盼回巢拍劇
此外，收起性感的李珊珊表示有機會也希望返無綫拍劇，談到感情事，她說：「難得呢排咁靜，唔好亂講喇！總之我有穩定嘅對象一定會公開。」
採訪、攝影：何慧斯