下屆特首大熱唐英年負責為政改拆彈，為免中伏益咗CY，唐公子步步為營，除咗路線圖，幾乎有求必應，眼見噚日天氣凍，同民主黨喺山頂官邸嘅會面改在政府總部，移船就磡免議員、記者受寒，同煲呔敵視傳媒嘅態度有天淵之別。
抗議方式很黃
雖然唐公子順得人，可惜白鴿黨都唔齊人，主席何俊仁同鄭家富冇到，唔係唔畀面，只係仁哥大感冒，阿富則因為開會而分身不暇，改由卿姐領軍。何秀蘭同長毛噚日都要開會聆訊鄭家純，所以僅到場幾分鐘就鬆人，何秀蘭將意見錄影放上YouTube，叫唐公子自己睇；長毛交完請願信亦起身，笑言不在官邸會面，唐公子就唔可以灌議員紅酒博支持。
政改翻叮05方案，泛民好難收貨，民主黨、公民黨已動員黨員今日去立法會外抗議，之後會去政府總部綁黃絲帶，要求須普選方案；社民連則號召網民殺上禮賓府，要求煲呔還政於民。選擇綁黃絲帶據講有段古，因為暫冇政黨以黃色做主題色（前綫已名存實亡），日後爭取普選活動，都會以黃色做主題顏色。