九巴網頁，關你咩事？當然有關，我偏唔信你日日出入都靠私家車或搭的士，唔少人因工作需要，仲可能經常查找車費表和巴士路線圖。九巴網頁自02年採用點對點搜尋方式後，今日再來大翻新，要搵車站位置、車費、班次等，比以前更為詳細。你可輸入巴士號碼來搵，輸入地方名亦得，再唔係自己用大頭針在其網頁的GoogleMap上自訂路線再列出沿途各站，實無走雞。而且貼心到連巴士站的相片都有，唔俾你搵錯地方。同時，也有手機版可供下載搜尋器，但內容相對簡化，以文字為主，亦少了大頭針可以玩。
除實用性更新外，網頁還加入「九巴博物館」，為巴士迷而設，看盡新舊巴士外觀。此外，想了解公共巴士的歷史演變亦得，在「發展里程」內可找到一條Timeline，隨你移前移後，了解九巴歷史，幾適合學生搵料交功課用。
記者︰陸俊雄
