無綫嘅《萬千星輝賀台慶》會喺聽晚舉行，除咗係無綫42周年台慶之外，更加係六叔邵逸夫102歲新曆生日，當然安排好一連串精采節目同六叔賀壽。由於阮兆祥、王祖藍同李思捷07年喺台慶扮嘢表演大受好評，無綫連續兩年都搵呢三位扮嘢福祿壽嚟贈興。
明玩緋聞情侶
雖然佢哋對今年扮嘢表演極度保密，但馮仁昭打聽到佢哋聽晚齊扮飲食界猛人，王祖藍扮周中師傅，李思捷扮蘇施黃，阮兆祥就會扮梁文韜，唔知佢哋三個搞笑之餘，會唔會整番幾味同六叔賀壽？
除咗福祿壽之外，無綫聽晚仲會擺分手男女佘詩曼同鄭嘉穎，仲有緋聞男女黃宗澤同胡杏兒上枱，其中黃宗澤會同胡杏兒孖住曾志偉做搞笑台慶劇《巨B》，阿佘就會同鄭嘉穎、馬浚偉同馬國明表演《驚喜合唱crossover》，聽聞到時會先安排商天娥、石修同陳鴻烈唱歌表演，然後唱唱吓肥娥就會變身成瘦佘。另外，謝雪心、程可為同雪妮就會唱歌變身成楊思琦、鍾嘉欣同陳茵媺，聽落都幾得意。
