前日提及「保育報販」，係有感而發，香港呢個城市嘅傳統特色之中，大牌檔已經極少見，街邊檔攤亦越來越少，如陶傑所言，我哋可以回憶嘅舊事物就快唔見晒。大牌檔有一個大弱點，就係佔地較多，兼明火煮食，於當今環境，肯定唔適合，譬如左丁山兒童時代居於洗衣街，經常喺奶路臣街西洋菜街地段嘅大牌檔食雲吞麪。但今日嘅奶路臣街西洋菜街日日萬人空巷，點可以容納兩至三個街邊大牌檔呀，時代進展係有時要淘汰一啲舊事物嘅，此乃無可奈何之事。
報紙檔又唔同，佔地較細，不構成安全威脅，只要報販守規矩，不違規擴充地盤阻礙行人通道，商舖茶樓酒家與行人都會相就相就，當然食環署亦要睇緊啲，否則只會益咗啲博懵擴充之報攤，對守法報販不公平。台灣報紙極倚賴便利店與訂戶嚟賣報紙，外國亦然，只有香港報攤仍然有生意有活力，能夠幫助報館賣紙，而且找數期會快過便利店，對報館現金流有利。
可惜嘅係，互聯網盛行之後，報紙雜誌嘅銷量一年不如一年，報販生意話唔受影響就假嘅，於是唔少報販兼賣紙巾與香煙幫補吓，以彌補報刊銷量下跌嘅損失，但政府當局執法尺度不一，例如對賣煙呢回事，就近乎霸道，睇報紙知道「全港報販大聯盟」主席廖社青講，零售香煙佔報販三成生意，今年加稅後香煙收入減少二至三成，影響重大。最近仲話要從嚴管制㖭，唔怪得廖社青佢哋要搞抗議。
左丁山小時候就在街頭替一間茶樓門前嘅報販睇檔，報販蛇王一小時，左丁山就睇檔一小時，冇報酬o架，肯睇檔嘅主因係可以唔使畀錢就睇勻報攤上所有報紙（記得嗰陣時冇乜雜誌可賣），於是養成閱報習慣，對時事識得多過人，同學無人能及，真想唔到自己後來成為傳媒人㖭。香港報攤養活好多人，亦培養過唔少人才，十年前有發行大哥捐錢畀報販子弟留學外國，搵左丁山做評審之一，當然一口應承。家見到報販抗議，不禁有感而發，希望當局唔好趕絕報販。