曹Sir曹仁超較早前曾經因為佢嘅港式普通話而紅遍中港兩地，早幾個月，佢以普通話接受內地傳媒嘅訪問片段，曾經喺YouTube熱爆，除咗為大家帶嚟娛樂，亦令大家講普通話嘅信心大增，起碼唔會差得過曹Sir啩。
「經濟」變「精子」
事隔數月，經過一番努力，曹Sir「煲冬瓜」已有明顯改進。噚日佢出席香港經濟峯會2010記者會時，就膽敢以普通話講足全場，不過仲有唔少發音未夠標準，例如「經濟」變成「精子」之類。所以到咗12月14日舉行嘅經濟峯會論壇，佢話明都係講番廣東話，但就好希望喺2011年嘅經濟峯會，能夠以普通話發表演說咁話。
李小加向曹Sir送高帽
而今屆峯會另一位嘉賓──港交所（388）候任行政總裁李小加，佢就掉轉頭努力學講廣東話，李總裁話，如果明年佢講廣東話，有曹Sir講普通話一半功力已經好好。
曹Sir喺記者會上，率先為大家透視明年股市走勢，佢話明年股市悲觀中不消極，樂觀中不亢奮，要選股唔選市。明年最大問題，係股市會拉起經濟，定係經濟拖低股市，佢叫大家喺家嘅高位唔好再追貨。
佢又話，美元隨時會挾空倉回升，令商品股市受壓。
李華華
mailto:[email protected]