奸人堅石堅病逝，但奸角最近出現了接班人，就是無綫綠葉王李國麟。他在熱播無綫劇《宮心計》中飾演掌握大權的太監馬元贄，為人囂張霸道，橫蠻弄權，李國麟把角色拿揑得宜，簡直人見人憎，原來他下了不少苦功，花了比平時多三倍時間揣摩和刨劇本。一分耕耘一分收穫，他又乘勢勸勉無綫小生花旦要珍惜機會。
撰文：比華利
無綫劇集《宮心計》已播了一半，高潮迭起，劇中奸人當道，欲濫權操控朝中大局的大將軍馬元贄非常乞人憎，令觀眾邊睇邊鬧，不過飾演這角色的李國麟直言演得過癮。李國麟日前拖着妻女在金鐘享家庭樂，沿途不少年輕男女大叫他馬將軍，還爭着與他合照。
「馬元贄抵死」
李國麟憑角色人氣升呢，他說：「好耐未試過有角色咁大迴響，真係奸得好。」他最感激該劇監製梅小青知遇之恩，他說：「小青姐選角好恰當，每個人都可以發揮，我呢次得到觀眾支持，實在要多謝佢。」扮演太監出身的馬將軍，李國麟要演得有別過往古裝劇中的公公，因為馬將軍比較有霸氣，他說：「我收指令後，花咗超過3倍時間刨劇本，揣摩角色。」
談到《宮》劇受歡迎，李國麟說：「觀眾睇得開心就得，其實小青姐對個劇要求好嚴格，近乎雞蛋裏挑骨頭，每一幕佢都做QC（品質檢查）。」他又表示有兩幕未能過關：「有場講我同陳豪喺城樓對話，目送被逼走嘅老臣劉丹出宮，偏偏小青姐睇片發現畫面後面隱約見到一個老臨瞓覺；另一場係我同皇帝蕭正楠對峙，大家培養好情緒爭拗，小青姐又嫌蕭正楠嘅衣領唔夠挺直，結果兩場都要重拍。」
劇中馬將軍作惡多端，但要到大結局才死，可謂惡有惡報，李國麟直指角色抵死：「馬將軍呢個角色唔咁早死，可以對套劇起化學作用，帶起高潮位，佢咁命硬，又可以畀我多啲發揮，雙重得益。」
身為綠葉王之一的李國麟，先後在劇集中跟無綫一班親生仔女合作過，問他看好誰最有潛質彈出？
讚林峯用心
李國麟不加思索即說：「小生我睇好林峯，我哋喺劇集《談情說愛》扮父子，佢唔止家境好，演戲又用心，入行日子淺，但前途無限。」花旦方面，李國麟大讚佘詩曼和楊怡，三人在《宮》劇中最多對手戲，他說：「阿佘真係勤力到你唔信，但捱極都咁光滑。楊怡就對自己嘅要求一日比一日多，無綫養住呢班（藝）人真係執到，個個都好努力。」
李國麟也不忘勸勉這班上位小生花旦，他說：「家電視台競爭冇咁多，無綫又咁強勢培訓新人，佢哋有咁好機會要好好珍惜，要謹記『善泳易溺』。」
囡囡追劇唔明四字詞
李國麟在鏡頭前是《宮心計》的馬元贄大將軍，奸到出汁，但回家後，面對太太Angel和7歲獨女李沅薐（BiBi），他即變回好老公和慈父真身。
李國麟一家三口日前到金鐘香港公園耍樂，BiBi看到巨型噴水池即表現雀躍，卻細膽不敢穿過水柱進入當中小亭，在爸爸李國麟壯膽下，兩父女拖手勇闖，BiBi興奮得笑不停，其間Angel充任攝影師為父女拍照留念。BiBi玩累了與雙親坐下吃爆穀，她專挑最大粒爆穀孝敬爸爸，隨即又挑另一粒餵媽咪，最後才放進自己小嘴。
錫爹哋多啲
BiBi是爸爸的小fans，最近也有追看《宮》劇，她說：「爹爹好奸。」由於對白太多四字詞，對念小二的她來說較深奧，有時不太了解。
問BiBi到底錫爸爸還是媽媽多一點？她口甜舌滑說：「兩個都咁錫。」雙親聽後異口同聲表明不會呷醋，想BiBi坦白，她才肯細細聲說：「我錫爹爹多啲。」可能李國麟平時拍戲作息不定，對囡囡有求必應，較太太寬鬆，李國麟說：「我雖然會縱佢，但我好緊張佢對人嘅禮貌同言行，一有錯就糾正，家教比學業更重要。」Angel認同求學不是求分數，她也不想囡囡承受太大功課壓力，她說：「我唔一定要佢科科100分，只要求佢要keep住步伐，唔可以行得慢過人同倒退。」