理工大學噚日頒授大學院士榮銜畀8位傑出人士，其中一個係中國移動（941）董事長王建宙，除咗因為王總喺電訊業同工程界享負盛名，更重要係佢前幾年喺理大拎咗個工商管理學位之後，仲一直同理大保持密切聯繫，經常同理大師生分享佢嘅專業知識同管理哲學。
話晒係全球最大電訊公司領導人，佢南下香江，自然吸引大批財經記者採訪，王總話，唔會喺理大開班授教。記者們自然追問公司發展，但大致上都係「倒帶」講舊嘢：去上海國際板上市無時間表、未定實邊間投行做保薦人；入股台灣遠傳電信仲等緊批。
之但係，華華睇過王總呢個星期嘅行程，聽日會喺一年一度嘅亞洲移動通信大會現身，星期四會去深圳參加一個研討會，睇嚟要跟實佢至得嘞。