十一月七日沙田跑馬有「樂聲盃」賽事，由信興集團贊助，例牌在賽馬會廂房請客，除大量電器界人士參加外，亦有不少大學校長級人物，因為本港每一間大學都有至少一座蒙民偉樓，大學高層梗係要畀面蒙博士，接受邀請出席樂聲盃PanasonicCup啦。
凡此場合，左丁山幾乎一定輸錢。無他者，掛住應酬傾偈，冇時間研究臨場馬匹狀態與每場大勢，隨意咁買馬，真係瓜多過菜。都係研究Ｅ好嘢，前七場一味咁傾偈，到咗第八場樂聲盃先至大力下注「白玉駿駒」獨贏與位置，一箸夾中，跟住就唔玩咯。飛機Ｗ唔多識馬嘅，但知道研究Ｅ厲害，一於照跟，笑到好開心。
左丁山贏錢冇份，在看台碰到電器業界人馬主Ｃ，係咁意問佢有何搞作，點知佢有好多嘢講，話有一個電子電器業界嘅環保視察團，到日本參觀電器回收處理廠，睇吓人哋如何先進，不過佢就唔得閒去。點解唔係去睇紅葉而係去睇工廠呀？馬主Ｃ話：「特區政府搞咗慳電燈，跟住就會要我哋搞電器回收，例如你要換架新電視，丟棄舊電視，我哋業界要負責任。但特區政府官員冇邊過識得一套完整嘅回收方法與處理程序啫，同我哋開會，總係講不出一個所以然，我哋行家咪不如自己學習，去日本睇吓囉。」
據馬主Ｃ講，香港電器用品回收主要有四大類，就係冷氣機、雪櫃、電視與洗衣機。香港人每年丟掉過百萬部，數目驚人，確係要諗辦法處理，佢哋行家好支持回收，但魔鬼在細節裏。特區政府官員講唔出或唔識講，點好呀？馬主Ｃ話冷氣機之壓縮器（compressor）中化工物料，必須小心處理，日本人會在室內拆除，清洗乾淨，確驗無毒之後，將啲壓縮器運往大陸嘅回收廠，廠內工人用人手將銅線逐條拆出嚟，滙集一起送去煉銅廠。目前香港完全冇呢啲工場與設備，亦無煉銅廠，回收後只識送往垃圾堆填區，笑死與嚇壞日本人。邱局長、潘副局長識唔識呀？馬主Ｃ不敢寄以厚望，話只希望政府搞環保要諗通全局，唔好見一單做一單，以為可以得到環保掌聲，點知最後落得慘淡收場！