獅子座流星雨又嚟料，天文台話周三凌晨四點至六點，即係今夜臨天光前，將係香港見到數目最多流星雨嘅時辰。雖然天文台預料郊區氣溫跌至10℃，不過好彩有部LexusIS250C陪伴，暖氣＋暖凳，就算開住篷瞓喺度睇流星，一樣暖笠笠。
記者：徐影龍
攝影：伍慶泉
Model：Alia@PureModels
無懼寒風數星星
十年前同朋友喺赤柱睇過一次獅子座流星雨，印象相當難忘，每當流星劃過，在場一大班人總不期然嘩聲四起，氣氛相當之好。今夜嘅流星雨，據天文台預測，最高峯將有幾十顆、以至過千顆流星掠過，極之壯觀。可惜天公不太作美，氣溫預料低至13℃，郊區更有機會跌至10℃，若落埋雨就凍上加凍。可能你刻下安坐家中，想像唔到有幾凍，但拍攝當晚碰啱冷鋒到港，大坳門郊野公園又係得番攝氏十零度，加上寒風呼呼，去到目的地已經無勇氣開篷影相。除咗狂開暖氣外，猛然省起LexusIS250C座椅有冷暖功能，二話不說開到最熱，即時有股暖流由PatPat傳至上身，成個人暖番晒，拉低張凳、開埋篷都無懼寒風。瞓喺度望住黑漆漆夜空，幻想着流星不停劃過，都幾浪漫。
平民DreamCar
本身對開篷車情有獨鍾，對IS250C自然存有好感，開住篷揸成晚，都唔係想像中咁凍。除暖氣系統夠到家，偏長而大幅傾斜嘅擋風玻璃亦應一讚，視野廣闊之餘，仲啱啱好幫我擋晒迎面急風，你會佩服凌志嘅細心同體貼。偶爾停車等人，遇到一班西裝友停低腳步，識貨咁話「咦，新款喎！」就算架車唔係我，都一樣湧起虛榮感。經過三日兩夜長測，差不多行咗二百幾公里，大部份時間都係開篷慢揸遊車河，稍嫌D波有點溫柔斯文，轉至SMode反應會快一點，但要玩狂野，點及軚+/-波咁令人愛不釋手。上斜固然可Hold波Keep轉數，就算如將軍澳隧道般大落斜，輕輕拖低「一粒」，五變四、再四轉三，EngineBraking順暢收車，快慢全掌控於左右兩隻手指，連腳掣都唔使踩，真係好鬼瀟灑。操控性亦無得彈，東隧出東廊往銅鑼灣，一出隧道口個左彎又深又急，平時慢行當然無問題，但IS250C爆住上依然勁咬彎，尾轆一啲都唔覺有甩嘅感覺，仲可以喺彎中Cut線爬頭，貫徹我懶瀟灑嘅風格。漸漸愛上IS250C，起碼唔係嚇怕人嘅車價，算係唔使等中馬票，都有機會買到DreamCar。
LexusIS250C
引擎：2,500ccV6
馬力：208PS/6,400rpm
扭力：252Nm/4,800rpm
傳動：6速+/-波箱，後驅
售價：$499,210
查詢：皇冠車行（25119430
天文台推薦最佳靚位
天文台推薦咗幾個香港最佳觀星地點，個人心水首選係大坳門郊野公園，有錶位同廁所，Hea足一晚都唔成問題，最正係有埋燒烤爐，一班人約埋一齊，一邊BBQ一邊「賞星」，又可以火爐取光取暖，唔怕凍嘅更可鋪張蓆喺風箏場度，瞓喺一大片草地睇星傾心事，一流。
大坳門郊野公園易搵唔難去，沙田、馬鞍山出發，可穿過西貢往清水灣方向行。由觀塘、將軍澳出發的話，可由將軍澳醫院旁之坑口道直上，兩者最後均經過清水灣花園前方迴旋處，唔好轉入大清水泳灘同布袋澳，順行幾分鐘就到達目的地。
其他推介
