內地樓市政策方向最近搖擺不定，一時傳要收緊，一時又傳放鬆，無論政策如何，樓價一樣有升冇跌。1至10月，大中城市錄得14個月以來最大升幅，整體升3.9%；房地產開發投資達2.84萬億元人民幣（下同），按年升近19%。
睇整體似乎唔升得幾多，但細分一手樓價︰一線城市以廣州按年升12%稱冠、深圳升8.9%，二線城市寧波及錦州都升逾8%。二手樓升得仲勁，深圳18.9%、溫州13.7%、杭州11.7%、金華10.6%，明顯炒落後。樓價升唔停，吸引不少一線買家轉入二三線城市搵投資機會，睇內地報章話，遠至長春，要買新樓最少早一晚排隊，仲要交低1萬銀誠意金領張VIP卡先可以攞籌揀樓。皆因當地06年較好地段嘅樓都只係賣不足3000元一平方米，幾年間已升逾67%至5000元。
越投靚盤多利股價
內地喜歡用房價收入比率，即係話唔計息，一個家庭唔食唔用要幾多年先可以供滿一層樓，北京係27:1，長春已屆11:1水平。打工仔特別係受高深教育一群，工資水平跟唔上樓價，都紛紛恐慌性買樓，首期只好攤大手板問父母攞，漸漸形成「四加二」的買樓模式，即一間屋背後往往係男女雙方父母出錢畀首期，每月供款就由年輕夫婦負責，變相3個家庭供一層樓先勉強負擔得到。根據商務部資料，八成新人要靠屋企幫手置業。雖然反映樓價已飛升至不太合理的水平，同時亦說明上一代的高儲蓄正在不斷釋放。由3個家庭去撐一層貴樓看似荒謬，總比香港的冇殼蝸牛夾硬以九成半按揭上車安全，泡沫係有，但爆破風險不見得太高。
周末上廣州睇越秀投資（123）廣州嘅地盤同樓盤，一線地區如天河區珠江新城住宅，每平方米售價已超越2萬元，高103層的IFC國金西塔寫字樓物業明年入伙，廣州的四季酒店將趕及明年底亞運會舉辦前試業，有望成為第二個二沙島的廣州大學城4幅地皮，係未來盈利增長新動力，樓價爆升時有樓可賣，全賴管理層積極進取，股價當然一洗頹風，以公司今年售樓達標率已超過250%，配合重組業務提升估值，短期要重見3蚊應冇走雞。
胡孟青