呢個月初東亞運倒數30日時，大會介紹八名禮儀小姐出場，既有驚喜又抵讚，因為170幾個禮儀小姐全部香港製造；話口未完，噚日竟然宣佈喺12月5號晚嘅東亞運開幕禮上，引領各國運動員出場嘅九個「領導員小姐」之中，有四個嚟自中國內地，仲個個介乎18到22歲、身高達1.77米以上；要用到國援，唔通港女真係揀無可揀？
四名國援全部參加過北京奧運，其中19歲嘅于佩身高達1.81米，喺京奧就帶領中國隊出場。于佩腳頭甚佳，事關中國隊喺京奧贏咗歷來最多嘅51金21銀28銅；今次東亞運唔知邊個國家地區隊伍咁好彩由佢帶出場呢？至於天生明星相嘅陳詩，京奧時負責帶領港隊出場，最後港隊成績麻麻，希望今次換一換人啦。
開幕禮花費4000萬
另外兩位領導員亦大有來頭，大家仲記得上月建政60周年慶典，閱兵時喺一大堆飛機大炮之中仍然好搶眼嘅徒步女民兵方隊，領隊張曉菲同趙娜，兩位女民兵單靠一頭清爽短髮，同20歲都未夠嘅青春活力，當日迷倒好多港男毒男宅男，總之就搶眼過任何新型武器。剩番個五個香港領導員，相信都要有咁上下先拍得住佢哋。
民政事務局局長曾德成噚日喺東亞運開幕禮記者會上，口口聲聲話開幕禮係整個運動會嘅靈魂，又話成功與否就睇開幕禮；既然咁難得，點解搵國援唔畀機會香港人？
噚日除咗揭曉四個領導員小姐，曾任京奧開幕禮執行總導演、將會主持今次東亞運開幕禮嘅總導演陳維亞，亦透露長個半鐘、花費4,000萬嘅維港開幕禮將分四幕演出，包括香港歷史、活力香港、未來香港及最後大合唱，仲有15分鐘煙花表演。演員方面，總數不足1,000人，其中300個又係來自內地；陳維亞仲大賣關子，唔肯講點聖火有乜新招，只係話一定唔會照抄京奧開幕禮嘅李寧一飛冲天點火喎。
mailto:[email protected]