庾澄慶（哈林）噚日喺寒冷天氣下，特別喺土瓜灣一間酒店泳池邊舉行「無底深愛巡迴演唱會」記者會，宣佈明年1月初喺紅館開騷。為配合水底主題，大會安排o靚模A.Lin谷胸扮美人魚出場，哈林抱起A.Lin後，仲問係咪可以拎返屋企食，之後佢笑住話：「魚係要嚟食嘅！」
記招完咗後，傳媒要求哈林抱起A.Lin，佢就尷尬以再抱會內傷為由婉拒，最終只畀A.Lin坐大髀，但都唔敢掂A.Lin條纖腰。問佢係咪好耐冇近女色，哈林話呢點唔重要，近日嘅工作係有史以嚟最忙，令佢連續十日頭痛，要食止痛藥，佢已經做咗檢查，但未知結果。
冇聯絡伊能靜
另外，囝囝如果就到時間都會嚟香港睇騷，問到前妻伊能靜嚟唔嚟，哈林話唔係佢管嘅部份，問到有冇為囝囝嘅事再同伊能靜聯絡？佢好冷淡話：「冇太多聯絡。」