完成咗南非友賽後，日本隊噚日亦抵埗香江，準備禮拜三晚嘅亞洲盃外圍賽同港隊交手。對於日本嚟講，呢場比賽會係佢哋今年最後一場A級賽事，所以教練岡田武史講明強陣出戰，咁對港隊嚟講，冷鋒加上日本刀鋒，呢次「雙鋒」都幾難頂！
靚師奶機場追星
禮拜三之戰除咗地利外，天時同人和都有利客軍日本，皆因近日氣溫轉冷，對於日本球員真係「弗」晒，而且比賽當日預計有一萬名球迷捧場，但呢幾日到銷售點買飛嘅多數都係日本fans，所以大球場隨時日系球迷仲多過港版球迷，作客變咗主場都有可能！當然，我求大俠唔排除開賽前，會有唔少香港球迷買飛入場撐港隊，但場波開6點半，真係放咗工都趕餐死。
中村俊輔勢列正選
講番日本抵港，有唔少日系球迷到機場接機，場面幾熱鬧，除咗小朋友外，亦有啲着住日聯球隊波衫嘅「靚師奶」追星，都咪話唔瘋狂。當然，亦有擁護日本隊嘅港版球迷在場攞簽名，但為數就唔多。
至於日本教練岡田武史就對於球隊上星期六，作客南非友賽最後打成0:0唔多滿意，因為球隊近期國際賽頻頻有「士哥」，而對南非亦有唔少攻勢，但就偏偏互交白卷。岡田話禮拜三對港隊，係今年最後一場A級賽事，而明年2月嘅東亞盃足球錦標賽，都未必會選效力歐洲球會嘅成員歸隊，所以對港隊會認真作戰，外流球員好似中村俊輔等都好大機會正選登場；而且可能排3前鋒陣式，實行強攻，對於首循環作客曾吞6蛋嘅港隊嚟講，唔係好消息。
不過我求大俠就睇過日本對南非嘅友賽精華，上次對港隊大演帽子戲法嘅土炮前鋒岡崎慎司仲好狀態，如果唔係南非門將有水準表現，早就已經被破大門；港隊守衞唔想多失，真係要實佢！不過另一前鋒大久保嘉人就右腳受傷，好大機會缺陣。
