社民連長毛同毓民喺立法會不時有「創舉」，負責執行主席命令「請」佢哋離開會議廳嘅保安員，少啲功夫都幾難完成任務。早前就有保安員喺煲呔宣讀施政報告期間，因為抬走長毛時意外受傷，八方聽聞佢已經康復得七七八八，但因為咁啱放緊大假，所以仲未「重返議會」。
未上班已辭工
秘書長吳文華自爆，立法會原本喺今年10月增聘三個二級保安員，減輕現職保安員嘅工作負擔。據報三位新人都係後生仔，吳文華深信新同事可以應付任何挑戰。可惜人算不如天算，呢三位原定11月返工嘅新丁，其中兩人喺保安受傷事件發生後突然打退堂鼓，未返工已經辭工，唔知係咪俾長毛嚇親。
聽日唐唐喺立法會公佈政改方案，泛民預料都係冇料到，長毛話唔定會再發難。咁立法會係咪要加強保安？吳文華話其實都冇乜好加強，只要保安員繼續謹守崗位就夠。佢就最希望應徵者大膽啲，事關啲議員其實都唔係咁可怕。