港隊噚日喺掃桿埔球場練波，為聽晚6點半喺大球場迎戰日本嘅亞盃外備戰；港隊南韓籍主教練金判坤，正煩緊聽日場大戰嘅陣容應採主攻定主守，但佢最希望球員以「為港而死」嘅鬥心應戰。
天文台噚日下晝發出寒冷天氣警告，港隊噚日喺攝氏15度低溫下，喺雨後濕滑嘅掃桿埔球場加緊操練，為聽晚嘅港日大戰作準備。港隊今日4點就喺大球場作賽前最後操練，稍後仲會決選18名大軍名單；但依噚日操練所見，港隊擬起用4-5-1陣式，將後衞陳偉豪推上一格，夥拍白鶴打雙防中，佢個中堅位則由效力杭州綠城嘅吳偉超出任，而下月去熱刺學藝嘅陳肇麒則喺前線「單天保至尊」。
主攻主守方向未定
港隊主教練金判坤就話，對住強陣來犯嘅日本，仲未定以主攻定主守應戰︰「球隊唔可以次次都主守，否則球迷會睇唔到我哋嘅進步，但以今（噚）日訓練咁採主攻嘅模式去對攻守兼備嘅日本，亦好冒險；我認為球員嘅鬥心仲未表現出嚟，南韓球員比賽好似『為國家而死』咁，香港球員亦要學識以『為港而死』嘅心態。」
另外，聽晚場波嘅門票已賣出6,500張，尖沙嘴adidas旗艦店同銅鑼灣bmaStudio賣埋今日就冇得賣喇，唔想去何文田足總買飛就要快手啦！票價為$50同$20（長者及學生票）。