航運股往往被視為炒經濟復蘇嘅一大指標，散戶最愛捕捉波羅的海指數炒作，但其實一個指數並不代表一切，歸根究柢行業情況有冇改善，還須看實際營運情況。眼見10月份中國出口仍跌一成有多，可見貨運環境仍嚴峻，目前大量貨輪停喺新加坡口岸外等運到境況依然，好似平時的士大排長龍咁款。
中國遠洋（1919）話，行業現時面對「三難」，即係接單難、交船難、融資難，今年仍要蝕錢。產能亦嚴重過剩，若按照中央振興船舶業提出喺明年底前佔世界造船完工量35%以上的目標，仍將有30%產能過剩，有新船，冇定單，兩邊輸。
集裝箱運貨唔得，唔好以為油價升番咁多，運油運煤嘅乾散貨就好得。從經營全球最大儲油庫嘅荷蘭Vopak第三季純利升三成，並兩度調升盈利預測可見，油品賣唔去，儲存原油及天然氣嘅地方同設備反而受惠。
光滙做埋碼頭兩邊賺
全球航運大阿哥馬士基（Maersk）第三季業績報告中亦話，短期對石油同天然氣運輸前景並不樂觀，所以業績中唯一畀到市場驚喜，反而係佢哋靈活應變，將冇用嘅運油輪「轉型」，改為離岸海上儲存庫。
風險相對岸上高啲，因為一旦漏油或出事引致火燒連環船，對船公司同生態環境都係大災難，但為求生存都要博一博。
實際需求仍然疲弱，油價回升又是一個經濟復蘇的馬多夫大騙局，石油股係升，但升幅遠遠不及油價。業界話全港最好賣嗰隻施羅德石油基金，已加大投資油品儲存同設備公司，認為會比油公司更賺錢。
唔想假手基金經理，就要承受股價震盪，早前震倉唔死得嘅光滙石油（933），就發展碼頭同石油儲存，最近公佈與大連長興島開發建設投資公司組成合營，在大連興建13至15個泊位的大連光滙碼頭，初期投資7.64億元。
海上供油唔係咁多公司做，除咗喺碼頭可以儲油，其他航企想學馬士基將航隊變成離岸油庫，隻船咪又係要喺呢類供油碼頭做「交收」，兩邊都賺到錢。
胡孟青