紅籌股近期有輪流炒上之勢，其中以越秀投資（123）表現最矚目，上月中裂口急升後，股價走勢可謂脫胎換骨，最高曾升見2.43元，累計升幅達50%。
最近又輪到首長國際（697），雖然有福山能源（639）副主席王力平沽貨，但一樣爆升，話唔定仲未炒完。短期回完氣，可能再試衝52周高位1.75元。
唔少散戶睇到呢條路，正留意緊隻深圳國際（152）會否步上述兩股後塵炒上。深國近日已突破複式頭肩底頸線0.62元，上周五股價一度高見0.65元，最後平收0.63元，仍守頸線之上，走勢未轉壞，暫當後抽。此外，10日線0.60元水平支持力不俗，只要守穩其上，後市可反覆再升。現水平可上車，獲利目標0.80元，失守0.57元止蝕。
深國業務多元化，涵蓋物流園、收費公路及港口，公司市值88億元；持有深高速（548）權益50.02%，及南玻A股1.077億股，合共市值已超過90億元，較本身公司市值還高，如果計及其他資產，真係閒閒哋過百億元。
方星俠