身在新加坡參加APEC峯會嘅煲呔，前日被踢爆一落機就去當地搵食，因乜解究咁猴擒？據知佢同一眾隨團官員喺飛機上冇啖好食，所以12號晚8點15分喺酒店checkin後，即刻打點去當地名店正文志記食豬雜湯，整個行動快狠準，比起佢嘅施政效率，真係拍馬都追唔上。
上次食肉骨茶被實
上次去新加坡約埋記者去食肉骨茶，點知搞出大頭佛。有政府中人話事後煲呔有咗心理陰影，以後搵食都唔想大鑼大鼓，靜靜雞唔好搞到人就算。有當年在場人士憶述，煲呔轉戰去第二間舖頭食肉骨茶時，全程被攝影機到實，搞到煲呔要發爛渣話唔食走人，攝影師先肯停機。雖然事發至今約兩年，但呢場鬧劇喺煲呔心中揮之不去，唔想再重演，惟有揀偷食。
本來偷食行動冚到實一實，冇香港記者知道，但勢估唔到煲呔同十幾名官員嗒緊豬雜湯時，突然有位女子上前影相，原來咁啱有新加坡記者去咗嗰間餐廳食嘢，當然唔放過踢爆香港特首偷食嘅新聞啦。