踏入11月，聯賽、盃賽、國際賽全開turbo，球員一星期平均要踢兩場，踢得多，受傷嘅機會自然多；啱啱過去上周六嘅國際賽，又有著名球星中招，今次「為國捐軀」係阿仙奴嘅荷蘭玻璃腳尹佩斯，佢喺對意大利場友賽傷右足踝韌帶，有排煩。
踢10幾分鐘被抬離場
呢位26歲射手喺對意大利友賽中，就好唔好彩咁中咗「殺人王」基亞連尼一腳，整傷足踝韌帶，聽講至少要唞兩個月，處理得唔好隨時要收「咧」，慘慘慘！我求大俠睇返條片，基亞連尼當時為咗阻止身處禁區內嘅尹佩斯起腳，成隻腳飛埋去，就係呢腳令到尹佩斯踢咗10幾分鐘就被擔架抬離場。
冇錯，雖然話基亞連尼當時係中波先，但個飛鏟真係勢凶夾狼，尹佩斯咁樣硬食一腳，唔使即時宣佈收「咧」算執番身彩，難怪前輩藍鑽石都話基亞連尼有潛質接替馬特拉斯做新一代「殺人王」。話時話，我求大俠都記得基亞連尼「殺人」有前科，25歲嘅佢舊年喺歐國盃操練，就已經試過鏟斷隊友簡拿華路左腳足踝韌帶，今次到尹佩斯，只能嘆佢唔好彩啦。
車仔骨幹傷晒
講返轉頭，起碼養傷兩個月嘅尹佩斯肯定會錯過喺月尾上演，阿仙奴主場對車路士嘅英超榜首大戰；缺少咗呢位10月英超最佳球員，對阿仙奴搶榜首都真係造成好大影響。睇番兩軍家嘅傷兵陣容，都可以講得上係天殘地缺，兵工廠嘅基捷基治、禾確特、丹尼遜、賓特拿、尹佩斯都唔出得，你都唔好話領隊雲格唔頭痛。
車路士亦都差唔多，骨幹艾殊利高爾、杜奧巴、林柏特等都傷晒，所以車仔一樣係讓兩臂；兩軍傷咗唔出得嘅加加埋埋，真係隨時可以湊夠一隊。況且家只係11月中，大吉利是講句，距離呢場大戰都仲有兩個禮拜，仲有冇人再傷都未知，容乜易聯賽榜首大戰變咗好似盃仔嘅二線兵大戰呀！
