《蘋果》獨家專訪
淡出影圈多年的性感女神鍾楚紅，多年來一直養尊處優，享受着自由自在的平淡生活，並不眷戀水銀燈下的璀璨。07年紅姑經歷喪夫之痛後，堅強地一個人面對，早前她接受本報獨家訪問時，提到亡夫朱家鼎時，紅姑的聲線即變得哽咽和眼紅紅地說：「我已經接受現實，始終大家感情太耐，希望將來諗起佢嘅時候係開心會笑，而唔係流眼淚。」堅強的紅姑對亡夫仍然念念不忘，看來她的心仍未ready接納另一段感情。
撰文：顏英儀
年齡對女性來說一直都是禁忌，不過直言對數字不敏感的紅姑，在她身上並未看到多少歲月的痕迹。對於明年就50歲，紅姑非但沒有懼怕，更說：「我已經有咗計劃，不過怕講咗唔靈，仍然會繼續用我嘅名氣做慈善幫助有需要的人。」
自79年參選港姐，紅姑出道至今剛好30年。至18年前嫁給廣告界才子朱家鼎，紅姑才非正式息影，婚後專心做朱太的她，過着清閒低調的生活，間中只會接拍廣告或出席一些公益及環保的工作。
憶亡夫 誓不忘情
紅姑愛笑，其招牌笑容更令人一見難忘，惜前年8月朱家鼎因食道癌病逝，紅姑獨力面對喪夫之痛，經過兩年的時間，終於走出喪夫的陰霾，當問到紅姑怎麼面對丈夫逝世的事實時，她的聲線即變得哽咽和眼睛泛紅地說：「我已經接受現實，始終大家感情太耐，我希望家、將來諗起佢嘅時候係開心會笑，而唔係流眼淚。」可見紅姑對亡夫仍然是十分掛念。問到是否ready另一段新戀情時，她則說：「愛不單止是男女的愛，還包括了朋友與家人的愛，而且我呢方面好鈍，亦唔覺得有人追求。」
今年中紅姑接受了reenex膠原自生中心的邀請成為代言人，更拍攝新一輯的廣告，以「無懼時間考驗．愛笑便笑」做主題，於廣告中紅姑再次展示了她那招牌的笑容，感覺依然燦爛。
拍電影 一時際遇
八、九十年代，紅姑拍過不少賣座的電影，更當過兩屆亞太影后（84年《男與女》、87年《秋天的童話》），不過她謙虛地說拍片多年來沒有一部令她滿意的代表作，她說：「我唔覺得自己特別幸運，可能係命運，我好細個入行，當時亦冇刻意爭取，戇居居咁入行，可能係際遇，當年拍得好多好密，拍到好攰，我又唔鍾意成為別人嘅焦點，唔想過要向人交代嘅生活，我咁早唔拍戲都係咁嘅原因，我想行出來自由自在，所以婚後唔拍戲都係咁嘅原因，想有自己嘅空間。」
閒時紅姑也有看電影，她近期喜歡的電影包括《聖訴》（Doubt）、經典愛情電影《男歡女愛》（AMan&AWoman）也喜歡，中國電影她亦有留意，例如《黃土地》等，「我鍾意言之有物嘅電影，睇完會令我思考。」問到紅姑有沒有復出的打算，她說：「當時我都冇煞有介事話要退出，可能係傳媒一廂情願，其實我冇復出嘅打算，如果要拍好多年前都會拍，我結婚時老公都冇叫我唔好拍，係我自己選擇，拍咗戲咁多年可會技癢？有時睇到好嘅電影好嘅劇本都好恨拍o架，如果呢個角色我做就好啦，始終拍咗咁多年，我仍然鍾意電影。」若果有荷李活的大製作找你拍可會心動？紅姑不考慮地說：「冇，唔係講邊度製作，我唔係咁虛榮，又唔係未拍過電影，都唔會好易吸引到我再拍。」
息影多年的紅姑身形依然fit到漏，生活健康的紅姑經常keep住做運動，她說：「平日主要做瑜伽，游水、行山，所以大餐之後都要收斂吓，我好擦得，一餐可以食好多，我從來唔節食，要自己調節平衡。」
新生活 重拾相機
現在紅姑一個人生活，閒時拿着相機周遊列國，畫畫、陶瓷，平日又愛行街市下廚自創新的菜式，更愛種花，十分享受生活，她說：「其實我鍾意攝影好多年，不過之前心情問題停咗，家希望可以重拾呢個興趣，其實都係玩吓啫，城市生活咁緊張都要unwind（放鬆）一下，我鍾意影大自然、建築物、人物題材，我覺得大自然好偉大。」
髮型：SevTsangofHairCulture
化妝：淑貞
服裝：StellaMcCartney
鳴謝：reenex膠原自生中心
走過美麗30年
小八卦：慨嘆那片維港景
近年積極參與慈善活動之外，紅姑亦十分積極推動環保，她在拍照的場地看着維港的景色，大嘆可惜地說：「見到個維多利亞海港填成咁我覺得好可惜，全世界冇一個地方好似香港咁有咁特別嘅地理環境，有一個咁靚嘅海港，香港政府點解冇呢方面美感嘅觸覺呢？一個政治唔應該只係注重經濟方面嘅發展，好多嘢係取代唔到。」
護膚之道
紅姑代言的reenex膠原自生中心，是以醫學美容科技，刺激人體細胞自發增生膠原，紅姑試用後大讚療程有效，她說：「做咗一段時間效果已很顯著，皮膚緊致咗，毛孔細咗，紋都淡咗，我好滿意，近日新試高效膠原自生組合療程，做完第一次皮膚已經即時有光澤，最重要係皮膚好似pumpup了，好有彈性，朋友都讚我皮膚白裏透紅。」
