每次睇完彼思動畫，童真都會返晒嚟！迪士尼本年大作《沖天救兵》已經到貨！唔只有齊Blu-ray、DVD以及VCD各版本，藍光版更內附3隻碟，收錄最新動畫短片；同時你仲可直接將Remote當成手掣，陪吓小朋友玩互動遊戲，又睇又玩，入過戲院都值得翻煲！
記者：陳國輝
Story
實踐童年承諾
回想吓，你嘅童年願望係乜？相信好多人早已經遺忘，但《沖天救兵》兩位主人翁阿卡以及佢老婆，自細有個夢想，就係要到充滿珍禽異獸嘅人間天堂！由拍拖、結婚、終老，二人從未放棄，直至妻子入院，阿卡把心一橫，承諾老婆離世前實現呢個願望！旅途中，唔止有一名小童軍與佢結伴同行，仲遇上一隻會講人話嘅狗，究竟結局會點，自己買隻碟睇喇！
睇完毛毛睇布料
記得幾年前睇《怪獸公司》，煲碟發燒友一直重點討論毛毛身上嘅「毛」，又自然又細緻，究竟係點畫出嚟？去到《沖天救兵》，經過呢幾年CG迅速發展，掌握呢種技術已經容易得多，但如果你認真買隻Blu-ray一煲再煲，或會發現，彼思又有新突破！講緊係衣衫上嘅布料，以往嘅動畫你唔覺得有乜特別，但今次竟能輕易識別布料嘅質地，好似阿卡最愛穿嘅絨布西裝，童軍小飛嘅針織襟章，甚至奸角身穿嘅黑色皮褸等，真實度近乎百分百；更離譜係，連冷衫上嘅小毛球，近鏡下亦清楚見到。舊DVD年代未必睇到嘅Details，全高清畫面下終於一目了然。
Bonus
送彼思短片
如果你係PIXAR粉絲，應該會留意旗下最新短片。今次3碟版特別加插咗幾段全新動畫，而且係高清嗰隻！除已播出嘅《半嚿雲》，另有《沖天救兵》外傳──《阿德特殊任務》，加埋差不多10分鐘，如果你對呢隻小狗有特殊感情，咁就一定要睇；此外，該影片嘅預告宣傳動畫，亦由PIXAR精心炮製，Fans唔可以錯過！至於導演訪問以及製作特輯，睇唔睇都無損失，反而不能錯過影碟內置嘅互動遊戲，玩法好簡單，只要估啱地圖上嘅國家名稱，積分高的話，你隨時可登上全球排名榜，光宗耀祖！
Profile
語言：粵語、國語、英語
字幕：中、英
片長：96分鐘
畫面：1.76：1
聲效：DolbyDigitalHD、DolbyDigital5.1EX
收錄：電影短片《半嚿雲》、阿德特殊務、毛查理的全新結局、卡叔婚姻生活（加長版）、互動遊戲等