八位老友定期集會，輪流做東，左丁山食人哋七次，先至請番一次，全年計平均數，甚為相宜。今期輪到左丁山做東，其他七位竟然一齊話得閒，真係少有，因為各有各忙，雖然每個月定實一個日子，到時仍然會有人唔得閒嘅。既然咁高興，又適值秋天大閘蟹之季節來臨，於是請大家到上海總會，迎人所好，主菜係蟹粉翅，個人主觀認為上海總會嘅蟹粉翅有極高水準，自從七年前余大狀賜飯，在此請吃蟹粉翅講雪廠街九號的故事以來，左丁山每年就在此吃番一碗半碗。
點知臨到吃飯，賓架Ｓ就來電話有急事失陪，賓架Ｗ剛好感冒病癒，話蟹粉翅嘅膽固醇含量過高，敬謝不敏，於是最識食嘅活力先生得其所哉！掃晒。坐在佢旁邊嘅基金Ｆ亦話要掃─掃樓呀，如果有錢嘅話。基金Ｆ係樓市大好友，佢認為現在香港樓價嘅上限係二萬元一呎，超過咗就好蝦人買，如有內地人或特別富豪出價七萬銀一呎，乃屬異數。基金經理只講平均數及公允值（fairvalue），點計出嚟o架？美國十年國庫債券息率約係三點四厘，係無風險投資嘅回報基準，以基金Ｆ之一手經驗及佢搜集之大量租盤資料計算，山頂、半山區、西九之豪宅租盤好難超過五十元一呎，呎租五十即年租六百元，除以三點四厘，資本價就係一萬七千六，除以三厘，就係二萬，故此純係計數，基金Ｆ認為豪宅樓呎價應在萬八至二萬元之間，佢又認為目前樓市暫時進入回氣期，因供應斷層，明年又會恢復升浪，有錢唔怕將樓掃！
基金Ｆ提醒，滙控行政總裁紀勤來港坐鎮，已對其他國際銀行產生影響，要考慮委派更高級數嘅僱員嚟亞洲頂住紀勤，在大多數情況之下，即係派嚟香港。此外，渣打大展拳腳，向高盛、瑞銀挖角，巴克萊預備擴充，南韓證券行（三星）又話要在香港開公司，故此基金Ｆ話將來租樓畀金融界expart，唔怕冇租收！聽佢講就一片好景，究其背後原因，就係外國金融機構，齊齊吼住大陸市場，佢哋唔去上海北京而到香港，當然係目前香港仲有競爭優勢之故。