煲呔去新加坡，出席APEC會議只係藉口，見胡總都只係煙幕，八方思疑佢其實係想去搵食。06年佢去新加坡想食黃亞細肉骨茶卻食咗閉門羮，對新加坡美食始終念念不忘，呢次去到獅城，唔去黃亞細，轉去幫襯當地名店正文志記豬雜湯。
隨員早個幾鐘到場打點
豬雜膽固醇勁高，煲呔冇有怕去搵食，應該好滋味，據講煲呔星期四晚9點鐘左右，帶隊一行11人浩浩蕩蕩現身，一班人當然有食招牌菜豬雜湯，仲有其他小菜，包括鹹魚肉餅、麻油雞、油菜、凉拌小菜、羅漢齋同豬腳醋等，埋單百幾蚊坡紙，大約600至700幾蚊港幣。
據正文志記太子爺鄒榮輝稱，煲呔幫襯頗大陣仗，早一晚已有「先頭部隊」試吃，另一名隨員則預先個幾鐘頭到場打點，侍候特首駕臨，不過佢話冇乜嘢特別措施迎接煲呔，事關煲呔冇包場，當晚照常做生意，只係每人送一碗紅棗白木耳糖水潤喉，答謝煲呔畀面。
正文志記有近40年歷史，係當地長龍名店，據聞每日用120公斤豬骨熬湯，老闆本來已經退休，今年9月重出江湖。