夠Car事：谷祖琳甜品喻車　林寶似芝麻糊

總覺得開糖水舖嘅成功秘訣，好唔好食係其次，有位泊車至係先決條件。好似喺西環開第二間糖水分店嘅谷祖琳同樣深明此道，更話最爽莫過於可以一邊整甜品，一邊可以聽吓有咩靚車駕到，諗吓咩靚車襯咩甜品。而佢每次見到「好似芝麻糊」嘅林寶堅尼就最開心。

記者：許維雅
攝影：陳陶鈞

糖水舖前靚車展

每次食糖水，糖水舖出面總有一大堆車泊喺門口，不過就從未見過11架名貴跑車一過次幫襯。早已聽聞《小甜谷》老闆娘谷祖琳話西環第二分店特別多靚車，只係估唔到原來架架都係過百萬嘅林寶堅尼、法拉利同AudiR8等辣跑。「呢度近海旁，環境舒服，揸車由皇后大道西沿住海旁過嚟，轉入卑路乍街再直行數分鐘，就好容易就搵到爹核士街。就重要係夠多地方泊車，班車會啲人好鍾意Morningdrive之後過嚟食嘢，所以我呢間西環分店就專登整咗張長Bar枱，等一班人可以圍埋一齊食，開心啲。」當日「跑車興趣小組」就有三架大牛、兩架小牛、四架Ferrari、一架AudiR8同日產FairladyZ一齊到場。爹核士街突然間變咗名車展覽場，令到一眾街坊停步圍觀甚至舉機拍照。大家想睇靚車兼食糖水，不妨星期日下午去碰吓運氣。

聽聲估車仔

糖水舖成日有咁多靚車駕到，最興奮嗰個一定係谷祖琳，喺澳洲16歲揸車到家，曾擁有BenzCLK、A190、SLK同PorscheBoxster。「我細個已經玩車仔唔玩公仔，大個就鍾意揸車嗰種速度感同刺激，電單車牌我都有。鍾意Benz，後來換架Boxster都有啲唔慣，好短時間就放咗。我家揸七人車Elgrand，夠舒適，音響仲好正。」
「第一次見到啲林寶同拉利車隊嚟食糖水時，興奮到即刻走出去睇。有時車未到，聲先到，就會同啲同事玩估車，我成日估中o架，因為林寶啲聲沉啲實啲嘅。」自言揸車有天份、從來無撞車、無俾人抄過牌嘅小谷果然女車神咁款。