領匯噚日正式宣佈潘啟迪加盟，接替藍列群做企業傳訊及策略總監，早前傳出會離職嘅藍列群，則戲劇性留任，出任高級策略顧問，協助行政總裁羅爾仁同潘啟迪。
另一人事變動係企業傳訊主管繆美詩下個月起辭任領匯全職工作，改以項目形式接領匯嘅job。繆美詩以前係新聞之花，八方聽聞佢日後或會為港台客串主持節目，即係話fans有機會喺螢幕再見到佢。
領匯大幅加租，商戶、政黨抗議無日無之，有人建議官府回購領匯股份「國家化」間公司，否則永無寧日，雖然官員斷言拒絕，不過八方懷疑已暗渡陳倉，事關當年搞領匯上市班底紛紛起身，換上做過房委會、房署嘅舊面孔，走回舊路，皆大歡喜。