呢排天口凍，最過癮梗係走去打邊爐食餐飽，不過好多人呢輪就繼續過冷河，馬時亨夠鐘上水，隨即去中策做非執行主席搵大錢，唔知係咪過完冷河條血管冇咁畸形。計計數，前金管局總裁任志剛退咗休個零月，仲要捱多五個月冰河期先可以重出江湖，任總噚日就話，除非獲批准，否則按規定退休半年內都唔可以做嘢，即係最快明年先可能見到沙皇再現，不過佢強調一定唔會全職喺商界工作，費事被人話有利益衝突，呢句話，真係潤到肥馬應一應。
呢輪開始寫blog嘅任總，噚日黑色星期五獲科大頒授工商管理榮譽博士學位。任總風采依然，好優游嘅佢同八方講，自己退休生活不知幾開心，只係要兼做自己秘書、司機辛苦啲。講到下一步工作，佢話真係言之尚早，自己都未有乜嘢方向，但係就希望繼續貢獻香港金融界，視乎有冇咁嘅機會。
任總過冷河期半年，所以佢最快下年3、4月先會考慮新工作，不過肯定唔會全職加入商界，興趣唔大之餘亦費事人哋亂諗，言下之意，肥馬搵真銀惹是非呢啲事，都係唔好做嘞。
不在其位不謀其政
部份退休高官熱衷議政，任總則話自己不在其位，不謀其政，有記者問佢金管局明年係咪應該如期退出百分百存款保障制度，佢拒絕置評。
煲呔身在新加坡，科大噚日搵咗署理特首唐英年負責主禮「扑帽」，唐公子同任總friend底，輪到任總被扑時，一向吊吊fing嘅唐唐忽然「雄起」，作狀兜嘢大大力「車」落任聰頂帽上面，之後仲笑騎騎，可能心諗既然代煲呔扑任總，唔出「行」力唔得喎。
噚日八方仲見到久無公開露面嘅大Sir鍾士元，一手湊大科大嘅佢好畀面坐足全場，行年92依然精神奕奕，不過步履有點蹣跚，要用助行架借力。噚日亦係科大新校長陳繁昌正式就職嘅日子，佢話一向唔信邪，就算黑色星期五就職都百無禁忌，對番鬼佬迷信得啖笑。
mailto:[email protected]