政府出口術壓樓市，令熾熱樓市急速冷卻，市場突然受到不明朗因素影響，觀望氣氛轉趨濃厚，加上近日見頂及泡沫言論滿天飛，有人趕趁高位沽貨離場，亦有人想乘機執平貨，更有不少買家怕接火棒，究竟後市走勢如何？睇淡抑或繼續睇好？今期請來樓市專家拆解樓市七大疑問。
1.本港兩大代理行老闆均認為，樓市見頂，如現時入市是否會接火棒？
●「炮哥」陳清白
買豪宅一定送死，銀碼大、高風險兼無回報
「買豪宅一定送死，銀碼大、高風險兼無回報，絕對唔買得，而且香港已失去唔少優勢，香港樓根本唔值咁貴，之前成交價簡直係天文數字，但相反買樓仔就無問題，因為市民大眾始終有基本居住需求，而家買係唔會接火棒。」人稱「炮哥」的資深投資者陳清白認為，最近兩大代理行老闆指出樓市見頂，只是希望業主肯減價，有生意可做。
●關焯照
樓價短期內調整3至5%
「樓價喺短期一、兩個月內一定有調整，但下跌幅度不會太大，只有3至5%，樓價高位調整後，將會從低位再上，一直升至明年年中，估計升幅約有10至15%。」經濟學家關焯照稱，樓價升勢源頭主要來自熱錢，加上息口不變及經濟復蘇等利好因素下，升勢將持續至明年年中為止。
●張文傑
豪宅價錢上得太誇張，現時買豪宅分分鐘接火棒
置業18區域經理張文傑指出，豪宅始終有別於一般中小型住宅，豪宅因早前價錢上得太誇張，故現時買豪宅分分鐘接火棒。相反，中小型樓因仍處健康價，4,000元一呎仍有不少選擇，升勢絕對正常。
●黃良昇
樓價下跌幅度不多，目前入市說不上會接到火棒
中原地產研究部聯席董事黃良昇分析說，，由於樓價已見高位，豪宅更創出天價，樓價於短期內突破不到高位便會向下，是次樓價回軟只屬技術性調整，加上金融條件沒有改變，資金持續泛濫，利息繼續低企，估計下跌幅度不多，僅2至3%，故目前入市說不上會接到火棒。
2.西半山豪宅賣到7萬元一呎打破世界紀錄，中小型住宅樓價將不受影響？
●「炮哥」陳清白
中小型住宅不會被豪宅拉動樓價
「首先我根本唔信西半山呢啲二、三線豪宅地段，可以賣到7萬蚊一呎！好在政府出口術壓一壓樓價，不然真係癲到十幾萬元一呎都有可能！豪宅和中小型住宅，屬於兩個完全不同市場，中小型住宅講求入息同回報，豪宅就係有錢人玩嘅玩意，甚至無回報都會搶住買。」陳清白認為，中小型住宅不會被豪宅拉動樓價。
●黃良昇
豪宅天價成交前後，中小型住宅樓價依舊橫行
「超級豪客係唔會去睇中小型住宅，唔會去買太古城，豪宅賣到幾貴，都唔會影響到中小型住宅樓價，最多只係心理影響，豪宅天價成交前後，中小型住宅樓價依舊橫行。」黃良昇指出，現時中小型住宅樓價正在回軟中，呎價仍然徘徊4,000至5,000元之間水平。
3.近日炒家頻頻散貨，甚至蝕錢都要賣，有何意味？
●「炮哥」陳清白
樓市一逆轉，炒家難散貨
「樓市一逆轉，炒家難散貨，買樓唔同買股票，樓越平就越難賣，尤其是大銀碼豪宅相當難出貨，因為之前高開三、四成，就算平賣一成，亦未必有人肯買。」
●黃良昇
調整市正淘汰一班底子唔好嘅炒家
「目前只係揸重貨炒家同實力唔夠嘅炒家，先至要散貨離場，調整市正淘汰一班底子唔好嘅炒家，佢哋一定要減價出貨，就算蝕錢都要賣，不過，由於呢類炒家始終唔多，唔會拖低整體樓價，而真正有實力嘅炒家，大可將單位出租。」
4.政府出口術干預樓市，樓市即時降溫，究竟調整期將維持多久？
●關焯照
調整期只維持一、兩個月
「今次樓市調整期唔會太耐，只係維持一、兩個月左右，估計樓價在短暫調整後，年底又再會上升，由於預期明年中本港息口會跟隨美國回升，擔心屆時對樓市會造成一定程度影響，或會出現危機。」
●黃良昇
調整期長短在乎新盤銷情
「調整期長短在乎新盤銷情，估計長則4個月，直至明年春節，短則或會好快，主要視乎即將發售嘅新盤有無賣大包，如果發展商肯平賣，相信可以吸引到買家，令樓市恢復入市氣氛，縮短調整期。目前不少人都有錢想買樓，只係嫌樓價太貴，買不到平樓而已。」
●張文傑
調整期將至明年春節
「樓市旺咗咁耐，調整一下反而令樓市發展更加健康，未來幾個新盤銷情，可以令市場再次聚焦，預期整體二手市場調整期將至明年春節。」
樓市轉吹淡風，租金卻持續上升，如何解讀？
●黃良昇
樓價有租金支持，跌幅不會大
「樓市雖然轉靜，但目前租金仍然上升，主要原因是本地需求不斷增加，高位賣咗層樓嘅業主，未換到樓會暫時租樓，買家不敢高追亦會租住先，但由於年底屬於傳統租市淡季，故租金可能會略為放緩，當過了季節性淡季後，租金便會再升，因租金始終還未到金融海嘯前高位，故租金將持續上升。樓價有租金支持，跌幅不會大。」
●「炮哥」陳清白
越來越多人放租，租金反而會跌
「我唔覺得租金升緊，租金升只係個別情況。好多人見層樓突然間蝕咗咁多錢，唔係個個捨得賣，唔捨得賣就會放租，我估計將來會越來越多人放租，令租盤供應大增，租金有壓力反而會下跌。」
7.最多人捧場的中小型住宅走勢如何？
●「炮哥」陳清白
中小型住宅跌唔到幾多
「中小型住宅呢類細價樓可以放心買，樓仔個價跌唔到幾多，尤其係市區樓，200萬元樓，每月可以租萬幾蚊，高回報之餘，樓價亦算吸引，而家都係幾千蚊呎，地價都唔止啦﹗加上預期資金會流向細價樓，我唔敢話會升，但市況一定會好活躍。我自己都入緊貨，不過，無業主肯賣。」
●黃良昇
明年經濟見底回升後，樓價有望上升
「中小型住宅樓價有無得升，主要睇打工仔有無人工加，按照目前情況估計，中小型住宅樓價在明年經濟見底回升後，樓價有望上升，但屆時要留意是打工仔未加人工，中小型住宅可能已搶先升。」
7.幾時才是買樓好時機？
●關焯照
有能力、有需要嘅買家，不妨等多兩個月
「有能力、有需要嘅買家，不妨等多兩個月，等樓價稍為回落3至5%先買樓，希望可以偷到位入市。若無急切需要嘅買家，或者可等待到明年中後，樓價回吐後再考慮。」
●張文傑
目前調整市中，有較多靚貨可供選擇
「目前的確係買樓時機，因為樓價正在調整中，下跌幅度介乎5%至10%內，而且在調整市中，還有較多靚貨可供選擇。買家不要等到跌完先買，估計明年春節跌完樓價便會向上，樓價再升就更難揀選。」