居屋貨尾推出反應熱烈，但經過大段時間擱置，真是要驗清楚才好收樓。專業驗樓師詹濟南指，層樓無論點驗，最終目的是慎防滲漏。單憑肉眼實難驗真，故詹Sir教大家利用不同小工具驗樓令滲水樓無所遁形。
記者：林佩婷
攝影：陳陶鈞
Model：Water、Ruby
資料提供：工程監督師（82028217）
V壹網：如何驗好你層樓？（廁廚篇）
http://www.vdonext.com/index.php?fuseaction=Features.Archive&channel_id=655834&program_id=662548
地板
最緊要平實
大廳為一屋門面，最緊要驗地板、牆壁是否四四正正，千萬小心空心牆及凹凸地。詹Sir話大廳跟房間的地板及牆壁一定要逐格敲度。「地板梗係要驗吓平唔平衡，同埋板塊之間嘅空隙差距大唔大，唔處理嘅話輕則地板易鬆脫，重則易損腳。要知地板平唔平衡，外行人可利用波子或乒乓波放地板中間看有無走位。至於度地磚高低，就可以用一塊0.5mm鐵片幫手，若地磚與地磚之間的接駁罅位高過鐵片就代表唔合格。最後用天線筆敲吓有無聲，有聲可能地板唔貼實地，有咩事好易甩出嚟。」
牆壁
「的的聲」合格
廳房的牆壁，表面看當然是望清楚有無變色或深色印，若有的話可能有滲水危險或生銹鐵釘在內，再看看有沒有裂紋，有的話亦有可能滲水。之後用天線筆逐尺敲打，利用不同的聲音找出問題。詹Sir續說：「若用天線筆敲出『的的聲』梗係無問題，但敲到『卜卜聲』就代表可能係空心牆，好容易有剝落危險。」
廚廁
喉管照妖鏡
廚廁最多水喉接駁位，若安裝或批盪有問題很易嚴重漏水。除開水喉驗去水位外，「好似廚廁假天花因為有嘢擋住，好多人會唔省起檢查。另外輕踢坐廁睇吓有無裝好螺絲，並按去水掣檢查有無異響及打開廁蓋驗冲水系統。廚房最高危係洗衣機去水位，一定要開櫃桶睇。」廚廁多固定設備擋住喉位，用鏡反射就能睇清。
門窗
千祈咪露罅
門窗方面，最重要是看清楚有無隙縫，否則落雨天滲水便損失慘重。玻璃窗最忌氣泡崩花，一個大風就好易吹爆！至於大門就要檢查清楚開關，詹Sir話門身都不可放過。「試過有次檢查道門，發現有啲窿窿，睇真啲原來成道門被蟲蛀咗，真係嚇死人。又有次發現大門條罅竟然超過一厘米闊，唔使鎖匙大力啲都開到。」至於露台亦有很多細微位，包括露台欄杆安好沒有，稍有鬆脫跌落街會死人！露台門接口位當然亦要驗清有無空隙，否則落雨入晒水就有排煩。
