滙控宣佈今年頭三季稅前利潤高於去年同期，旗下北美公司滙豐融資嘅虧損於第三季以前減少。行政總裁紀勤指出西方失業率上升，而新興市場國家保持經濟增長。消息一出，滙控股價上揚。
乜唔係呀，中國經濟領先全球，印度更叻到率先預備退市㖭，歐美邊度敢呀！滙控決定將行政總裁辦公室搬回香港，兼任亞太區主席，派銀行內最高級華人鄭海泉做中國/台灣區主席，棄美脫歐攻亞嘅策略昭然若揭，以後中印好，滙控好，買唔買或是否繼續持有滙控股票，就要睇中印與亞洲嘅經濟增長，左丁山就認為可以增持嘞。
滙控進軍中國之決心，可以從高爾夫球賽睇到。財務R與財務A兩位老友，到上海睇HSBC上海高爾夫球大賽，可以親自跟住老虎活士與冠軍Mickelson，觀察兩位絕頂高手打波。財務R話啲高手嘅集中力實在驚人，哪管大量觀眾在旁，財務A話站在地點距離老虎仔，只有十幾呎，親眼睇到佢嘅揮杆姿勢以及握杆（grip）之手指擺放角度，牢牢記住，大賽完畢後，自己與朋友在上海打波，學老虎仔嘅grip，居然十八洞內連打六個par，開心到不得了。
點解佢哋可以沿途跟住高手睇波？騎騎，當然係由滙控邀請兼安排嘅啦，財務R話在場內碰到大量國企嘅首席執行官或冧巴吐，唔使講都係同是滙豐客戶。賓架W係滙豐競爭對手，自然不受邀請，佢自嘆不如，話好難同滙豐爭，因據佢所知，HSBC上海高爾夫球賽每位參賽球手可得最低出場費二萬五千美元，包飛機票及住宿，另外獎金總數高達五百萬美元，全部贊助費加加埋埋要一千一百萬美元，世界上除咗滙控之外，冇邊間銀行敢贊助！花旗、美銀因受政府救援，喺美國贊助嘅高爾夫球賽，備受批評，點有魄力同滙豐在亞洲爭一日長短？滙控在商業銀行方面，可以話在亞洲大晒，肯用咁多錢贊助上海高球，你估玩泥沙呀？梗係有的放矢，世界人士跟紅頂白，以前東京車展係全球汽車業焦點所在，但今年歐洲啲大名牌車廠CEO只親身參加上海車展，唔去東京車展，大家明白何謂此消彼長啦！