廖碧兒為新戲《72家租客》犧牲色相，前晚拍攝一場抗議業主加租戲，她眼黏膠紙，嘴塞棉花，大哨牙嘴歪兼黑鼻窿，似足電影《功夫》的哨牙珍，還要被淋油，醜得無人認得，她笑咪咪的與張學友打招呼，學友禮貌回應，但卻認不得來者是誰。
無綫投資開拍的電影《72家租客》前晚在旺角一間茶餐廳，拍攝一場房客反對業主加租的戲份，監製曾志偉及演員張學友、黎耀祥、廖碧兒等齊集，麥長青、錢小豪、田雞及胡楓等也來客串。其中以廖碧兒最搶鏡，皆因她要扮醜女，眼睛貼膠紙，嘴裏塞棉花，大哨牙歪嘴兼塗黑鼻孔，整個人肥腫難分，有超級巨胸也絕不吸引，最恐怖是被人淋紅油，造型極其醜陋。
怕皮膚敏感
碧兒竟謂不覺得自己造型很醜，她說：「個妝化咗個幾鐘，好好玩好靚呀，不過塊面啲油乾咗，好辛苦，頭先學友望咗我好耐都唔認得我！」她謂只擔心紅油淋面會引致皮膚敏感。
張學友表示廖碧兒與他打招呼，他也禮貌地回應，但真的認不出她是誰，要細看1分鐘才知道，他說：「佢最後會變番靚女嘅。」
學友透露本來他與袁詠儀在戲中是一對，但志偉改了角色，最後志偉才是靚靚老公，學友笑說：「直情係以權謀私，有場戲志偉用墨潑我，佢話知嗰場戲我有份，佢先特登加潑墨，真係俾佢虐待呀！」原來戲中學友、志偉及靚靚青梅竹馬，靚靚兩個都喜歡，最後擲銀仔決定揀誰做老公。
趕中港賀歲
志偉透露該戲要趕在下月7日前拍竣，然後送往內地審批，他說：「本來只係香港做賀歲，家內地都要做賀歲，咪咁趕囉。嚟緊有場戲要喺邵氏拍，應該係香港有史以來最大嘅廠景，拍完就搞掂喇。」他謂為配合內地需要，會加插自由行角色。
扮日本浪人的黎耀祥穿日本服及木屐，他說：「我演一個漫畫店老闆，客串幾組戲啫，我仲要扮《死亡筆記》同《20世紀少年》嘅角色。」
採訪：張俊銘
攝影：仇志德
