香港電台電視部部份節目，好似《頭條新聞》、《議事論事》呢啲時事節目，經常要借用其他電視台新聞片，本着行家互相幫忙精神，各電視台向來好慷慨，畀港台用小量新聞片。不過，近日玩法變咗，八方聽聞港台高層落柯打，話第日唔好立亂用TVB嘅新聞片做節目。
《鏗鏘集》提及一台獨大
有港台中人話，高層冇講明發生乜事，小道消息流傳，有人思疑同上星期日播出嘅《鏗鏘集》有關。嗰集以〈電視已死？〉為題，探討本地免費電視發展問題，受訪者對一台獨大、扼殺創意，十年如一日攝製師奶電視劇好有意見；由於《鏗鏘集》喺無綫翡翠台出街，有人話咁搞法TVB高層唔嬲到出煙就奇，既然你做初一，莫怪我做十五，繼續借新聞片畀你？Noway啦。
TVB係名副其實大台，會唔會咁小器呀！有人同八方講，家陣《頭條新聞》、《議事論事》喺亞視播出，TVB唔想自己啲新聞片喺對家播出係可以理解，話唔定事過境遷，日後呢兩個節目喺番TVB出街，又冇事呢！