千百萬年前，人類已在地球上留下生命的足迹，為探討古人類的根源和意義，宣萱隨無綫《活著》攝製隊遠赴非洲埃塞俄比亞，拜訪了多個原始部族，不論是女族人割嘴唇放陶碟作裝飾，抑或男族人茹毛飲血，也令宣萱眼界大開，嘖嘖稱奇。 撰文：戴彩煥
宣萱、徐子珊和何守信等，月前到非洲及北京周口店拍攝無綫台慶特備節目《活著》，探討人類生存的啟示，該節目將於下周二晚推出。宣萱和徐子珊今次分別到非洲埃塞俄比亞和肯雅原始部族探訪，一睹各種千奇百怪的原始生活文化和習俗。
吸血 男人燕窩
今日的原始世界中，仍有許多令人觸目驚心的原始生活習慣，如Mursi族飲生牛血便是其中之一。宣萱說：「Mursi族男人出去放牛，佢哋冇嘢食嘅時候就會攞牛身上嘅營養，就係飲佢哋嘅血。非洲原始部落嘅男性，自細就要學習喺牛頸攞血，然後直接飲用，但唔可以殺死隻牛，佢哋先搵出牛頸嘅大動脈，然後用箭或者矛刺穿牛皮攞血飲，為保住隻牛條命，唔會飲太多血，喺未來一個月亦唔會喺同一隻身上再抽血，而拎夠血之後，佢哋會用手㩒實牛嘅傷口，跟住噴口水喺上面幫牛止血。當地男人個個一見到呢啲血都好開心，好似我哋啲女人見到燕窩咁，個個都爭住食。」雖說飲生牛血是當地人生活習慣，但一向愛動物的宣萱卻怕殘忍而不敢開「眼界」。
除非洲外，西伯利亞、美洲和太平洋現今仍有飲鮮血的原始行為，雖然有生物學家認為飲鮮血是最有效吸取鐵質的方法之一，但飲動物鮮血很容易會感染疾病，所以隨着進化，人類已由茹毛飲血轉為飼養牲畜，以肉類作為營養的來源。
破唇 越大越美
Mursi族另一觸目驚心的風俗，就是女族人割開下唇，然後放入陶泥碟作裝飾，碟越大，便代表女人越靚，亦代表將來結婚時男家的禮金越多。宣萱說：「見到真係有少少打冷顫，第一個感覺係好痛，好恐怖、好匪夷所思。」宣萱表示，Mursi族的女孩子大概14歲便開始在下唇割開少許，然後用木塞撐大，待傷口癒合後再割開再撐大，如是者重複多次，嘴唇的洞便越撐越大，據講最大可以放下一隻直徑12厘米的碟。
宣萱說：「每個女仔都係由媽媽落手做，冇消毒設備，每次做完都要休息幾個月，傷口先至會好番。有啲女仔試過發炎，搞到成個嘴腫晒。唔單止咁，因為隻碟係圓，放落嘴唇度之後，有兩隻牙就會頂住個碟，所以佢哋事前要剝咗兩隻牙。對Mursi族男人嚟講，一個女人可以忍受痛楚，將自己嘴唇撐到咁大，代表呢個女人身體好強壯，可以為自己延續最優質嘅下一代，亦因為咁，男人都好樂意畀多啲禮金，呢個就係原始世界對靚嘅準則。」
當宣萱拜訪埃塞俄比亞南部最接近原始人類生活的Hamer游牧民族，獲招待飲埃塞俄比亞最出名的咖啡時，竟突然被族人用咖啡噴面，其後才知道這是族人祝福貴賓的習俗。
美髮 牛油Gel頭
宣萱身為女性，對Hamer族女人打扮自然份外留意，當她見到女族人用牛的脂肪當啫喱膏gel頭髮，用花紅粉染髮，宣萱不禁大叫新奇：「Hamer女人唔想整散個頭，所以好耐都唔會洗頭。不過佢哋最怕係流汗，因為啲汗會整溶頭髮啲花紅粉，搞成塊面都變咗紅色。」
Hamer族還有一個十分傳統的成人禮考驗，就是每個新郎哥要除衫跳過一堆牛後才可娶老婆過門，象徵他們有足夠能力去傳宗接代，若然跳牛失敗，新郎便要等到下一年才可試跳，直至跳牛成功才能娶妻；同時，新郎的姊妹會在跳牛儀式前讓同村男性用荊棘鞭打背脊，就算鞭到皮開肉爛也不可以叫痛，因為Hamer族人相信，新郎姊妹身上的疤痕可證明她們有多願意為兄弟犧牲，女人越多疤痕便越光榮，縱使他日女人守寡，也可以得到親生兄弟照顧。宣萱今次拜訪Hamer族，便有機會親睹別開生面的跳牛儀式。
實況 挑戰尺度
無綫今次播映《活著》尤如挑戰電視尺度，因在介紹非洲原始部族的片段中，包括部份女族人赤裸上身及飲生牛血等殘忍令人不安鏡頭，實為近年電視史上罕見。對此監製鄧婉媚說：「我哋絕對唔係挑戰電視尺度，而係將原始部族真實生活呈現觀眾眼前，由於播映時間係晚上10點半，並非合家歡時段，而且我哋亦會提醒觀眾有令人不安嘅鏡頭，所以都唔擔心。」
《活著》下周二10:30PM
翡翠台首播