王晶入行28年，冇邊個香港人不是看他的戲長大、看他的劇來送飯，叫聲「電影教父」他受得起有餘。做得教父當然有真功夫，一部《大內密探靈靈狗》在內地就殺出過億票房。王晶今次唔玩警察、唔玩卧底，走去玩怪雞cult片，搵埋今年金像獎四大得主張家輝、鮑起靜、陳麗雲和廖啟智主演新作《旺角監獄》，成件事即刻唔同晒。邊個話王晶淨係識得玩屎尿屁？ 撰文：何永寧
現年54歲的王晶原名王日祥，父親是著名導演王天林，畢業於香港中文大學文學系，滿腹墨水，在影圈打滾28載，作品逾180部。身兼影視導演、編劇及製作人，百足咁多爪，近年他主攻內地市場，去年投資開拍許鞍華執導的電影《天水圍的日與夜》贏盡口碑。
港產片死因研究
王晶日前接受本報記者專訪，他表示目前香港電影極度倚靠內地市場，若失去這個大客戶，香港電影隨時玩完，他說：「以前嘅市場8成靠賣埠，家冇埠賣變咗要靠內地，所以呢個市場好重要，講緊係家盛行嘅中港合拍片或者引進片。你講嘅港產片10多年前，應該喺97嗰年已經死咗。」
晶哥謂港產片的死因很簡單，他說：「因為97年之後已經冇真真正正將電影當成生意嚟做嘅電影公司，佢哋唔計賺蝕咁做，根本唔係一盤生意。好多嘢都有數得計，用咁嘅製作水平嘅錢去投資一個萎縮嘅市場，答案好簡單：死梗。所以我同劉偉強合作，96年嘅《古惑仔》系列已經係水尾，之後我拍咗10部片，有8部都係蝕，雖然我將電影當一盤生意去run，但係個市場實在太差。」
闖神州扭轉乾坤
對於目前仍死守港產片這個金漆招牌，而不肯向合拍片低頭的同行，晶哥預言：「兩、三年內應該會有部份人因為生存唔到，會離開呢個行業。」對於香港人引以為傲的港片沒落，香港電影大陸化，他就表示不該看得那麼灰，晶哥說：「其實應該將呢個時候當成一個契機，畀香港電影去變。唔好話大陸口味就唔好，你夠睇咁多年荷李活片啦，《變形金剛》（Transformers）咪又係美國人嘅價值觀，你咪又係睇得鬼咁開心。」
晶哥表示當年韓國電影都是靠一部《生死諜變》扭轉一直以來韓片的傳統模式，成功闖出一片新天地，他說：「只要內地電影能夠有新嘅價值觀同元素加入，亦都可以咁成功。我相信呢件事未必會係香港人達成，好大機會由內地人自己完成。」不要以為王晶隨口講出這番似是而非的理論，事實上多年以前當一眾香港電影人仍致力挽救香港電影的時候，他已經北上為進軍內地市場做打算。當年有人笑王晶為儍仔或儍佬時，他已經花了多年時間做準備，他豪氣地說：「我部《大內密探靈靈狗》賣過億，係因為我之前返去內地，花咗5年時間去做研究，調查佢哋嘅口味、發行方法同要求。你估我儍嘅咩，未睇準就去郁手（拍戲）。」
勸後輩放下驕傲
王晶預言不出7年，假如香港幕後電影人不再力爭上游，連他們也會像港產片般被淹沒，他說：「電視已經係一個好好嘅啟示同教訓，以前10部內地電視劇，9部係香港人做導演，家咪得番一部係香港人拍。點解？因為內地人嘅素質唔會差過你班香港人，學識唔會比你低，學晒你啲嘢仲使乜你喺度，同樣事會發生喺電影行身上，最遲都係7年內。」晶哥語重心長的規勸年輕一代電影人，不要再自以為是，放下驕傲，虛心學習，特別是練好普通話是唯一生存之道。
另外，自港片時代，晶哥已經豪言有一條必勝拍戲方程式，他表示當前這條秘方仍然合用，他笑說：「人性啲基本嘢內地同香港都係一樣，只要作微調就可以，例如要企喺內地觀眾嘅角度出發。如果香港電影要翻盤，就要有由頭嚟過嘅決心，從來都係咁。目前內地嘅電影前景雖然好似好好，其實仲係混亂期，如果要我形容就係好似古時春秋時期，間間電影公司爭上位，遲吓就會汰弱留強，變成戰國，到時可能得番三幾個脈絡，即係山頭，呢件事不出10年內就會發生。」
拒討好金像獎評審
自言拍戲多年從來不肯主動嘗試新事物的王晶，最近就拍了人生第一部cult片《旺角監獄》，他說：「我一向拍市場鍾意嘅戲，我唔鍾意亦唔會將工作較飛，嘗試對我嚟講係件好唔負責任嘅事，試新嘢即係搵錢嚟玩，錢係唔可以用嚟試，唔單止錢啦，搵人試就更加唔負責任。我寧可你試完話畀我聽得再拍好過，我郁得手就一定要得。」
王晶續說：「今次拍《旺角監獄》只不過拍得其他片多，用嚟調劑吓自己，唔係個人好快乾。」
05及06年王晶就先後拍了兩部有別於屎尿屁的電影《黑白森林》及《臥虎》，皆獲得電影評論學會的最佳編劇獎，對於未能染指香港電影金像獎，王晶輕描淡寫表示：「每樣頒獎禮都有佢嘅遊戲規則，我唔啱個遊戲規則啫，我點會為攞獎去拍佢哋鍾意嘅片。」
拍cult片探討人性
對於首部cult片《旺角監獄》，晶哥指怪雞在片中各個演員都有精神病傾向，他說：「主角張家輝係精神分裂，佢坐完監返去旺角，佢會幻想有個人守住條登打士街，一出去就會俾人拉，所以令佢唔可以離開旺角呢個地方，孟瑤就係扮低智，戲中啲警察都係唔正常，心理有問題。我想借呢個故事話畀人知，呢個睇起嚟正常嘅世界，其實好唔正常。你以為佢正常嘅人偏偏就係有問題，睇嚟唔正常嘅人，就啱啱先係正常。」
《旺角監獄》上映日期：11月19日
「周星馳唔係朋友」
談電影，王晶滔滔不絕；對朋友的好惡，他亦簡單直接：「同周星馳，冇關係，唔係朋友。劉偉強係好朋友，經常通電話同見面，同劉德華嘅友誼最耐，就算冇合作都會keep住電話聯絡。」
累計10億票房
王晶執導或參與製作的電影達180多部，票房累計近10億港元，難得是20多年來作品不斷，捧紅了劉德華、周星馳及邱淑貞，以下為他六個階段的部份作品。
起步期
由電視躍身大銀幕，處男執導作食番《千王之王》條水開拍《千王鬥千霸》，導演作品初以賭片為主，後開始玩追女爛橋，《我愛Lolanto》更是當中的表表者。
《千王鬥千霸》 1981年
《賊王之王》 1982年
《獵魔者》 1982年
《花心大少》 1983年
《青蛙王子》 1984年
《我愛Lolanto》 1984年
上位期
《精裝追女仔》系列將鹹濕仔媾索女橋段發揚光大，屎尿屁齊全，拍極都有。
《精裝追女仔》 1987年
《魔翡翠》 1987年
《撞邪先生》 1988年
《最佳損友》 1988年
《求愛敢死隊》 1988年
高峯期
以賭片起家的王晶再斬四両，神化周潤發做賭神，劉德華繼續演小混混，票房勁收4,000萬。
《賭神》 1989年
《至尊無上》 1989年
《專釣大鱷》 1989年
《至尊計狀元才》 1990年
《靚足100分》 1990年
《賭俠》 1990年
《驚天12小時》 1990年
《整蠱專家》 1991年
神話期
夥拍周星馳拍攝多部經典喜劇，更兼顧三級市場開拍電影《強姦》系列、《赤裸羔羊》更力捧愛將邱淑貞，但王晶只任監製，未有親自執導。
《賭城大亨之新哥傳奇》 1992年
《鹿鼎記》 1992年
《城市獵人》 1993年
《超級街頭霸王》 1993年
《逃學威龍3之龍過雞年》 1993年
《九品芝麻官之白面包青天》 1994年
《洪熙官》 1994年
《百變星君》 1995年
回落期
橋王無復昔日勇，電影題材食老本難創新意，即使有劉德華和黎明坐鎮亦未能再創高峯。
《賭俠1999》 1999年
《千王之王2000》 1999年
《黑馬王子》 1999年
《強姦終極篇之最後羔羊》 1999年
《笨小孩》 2000年
《情迷大話王》 2001年
回勇期
有《無間道》珠玉在前，同樣講卧底悲歌的《黑白森林》別有韻味，令人驚嘆原來王晶也可認認真真拍齣好戲。
《黑白森林》 2003年
《黑白戰場》 2005年
《金錢帝國》 2009年
《未來警察》 2009年
《大內密探靈靈狗》 2009年
資料來源：《蘋果》資料室
