全港公屋商戶總會噚日發起罷市，據稱有成3,000商戶參加，一齊熄燈三個鐘頭抗議，商戶唔做生意，噚日中午喺樂富商場集會抗議，高叫「領匯可恥」口號。呢個集會唔單止係聲討領匯大會，仲係一個抽水大會，全港政黨都有代表到場，當年投票支持領匯上市，令商戶捱貴租嘅黑手民主黨、民建聯、自由黨等，家陣卻企出嚟反領匯，如果領匯可恥，呢班政棍就係無恥。
公屋商戶總會歡迎洗底
本着有奶便是娘呢個真理，政客轉軚反領匯，務求扳回公屋選票係正常反應，對於呢啲今日的我打倒昨日的我嘅嘴臉，講出支持領匯上市，卻反對加租嘅荒謬言論，八方見得多、聽得多，唔奇怪，不過慘遭賣豬仔商戶仍然氣在心頭，現場消息話，民建聯立法會議員陳鑑林噚日帶同多個區議員落區為罷市商戶打氣，觸動商戶之痛，有人如見過街老鼠，忍唔住怒潑冷水趕政棍，場面十分激動咁話。
八方走訪多個商戶，冇人承認潑水；有街坊則稱火爆商戶只係作勢潑水，政棍瞬即逃之夭夭，所以冇人濕身。公屋商戶總會主席陳永成話，道聽塗說側聞有潑水事件，「不過我唔在場，見唔到事發經過。」民建聯黃大仙區議員黎榮浩話慰問商戶時，人人都好客氣，冇人淋水，「係唔係第二個政黨啊？」
政棍噚日抽水好彩冇濕身，唔代表日後有運行，陳永成話畀八方知，的確有商戶仍然對支持領匯上市嘅政黨好有意見，不過總會認為事到如今，糾纏於歷史錯誤無補於事，應該放眼未來，所以好歡迎政黨覺今是而昨非，加入反領匯瘋狂加租行列，「人誰無過？民主黨去年已經認錯洗底，有商戶希望民建聯都可以鼓起勇氣，承認過失。」
領匯上市時，政客紛紛護航，今日又掉轉頭鬧領匯，早知今日，何必當初？最無辜嘅可能係當時同領匯打官司嘅盧少蘭，嗰陣時人人視佢係阻人發達老而不，都話o架啦，不聽老人言，吃虧在眼前。
mailto:[email protected]