時值11月中，天氣乍暖還寒。對香港人來說，受影響的可能只是晚上睡覺仍要開冷氣，氣候變化似乎遙遠，但最近到訪孟加拉的黃貫中，親歷氣候對人類的影響之後，慨嘆說：「當地人好似永遠要受苦。」
黃貫中（Paul）早前代表樂施會，到孟加拉東北部受氣候影響情況嚴重的地區探訪，他特別帶同相機，將當地的情況一一拍下。雖然阿Paul曾多次隨不同慈善團體到貧困地區探訪，但他早前接受本報記者專訪時，仍不勝欷歔。
阿Paul說：「今次去咗一個禮拜，個感覺就係一塌糊塗同惡劣，我兩年前都去過孟加拉，但係今次竟然係覺得同上次冇乜唔同，當地人好似永遠都要受苦咁。」
年年洪水淹村
阿Paul到訪的Vabanipur村莊本來是遼闊的稻田，但卻因氣候變化，導致每年有6、7個月時間都被洪水淹浸，令靠耕種維生的居民更加困苦，阿Paul說：「好無奈，見到啲細蚊仔受苦就最難過，尤其係啲落後同埋發展中嘅地方，又係有更加多細蚊仔。其實去幾多次都係會唔開心，但係要盡量唔好將唔開心個樣俾佢哋見到，唔敢表現自己嘅情感出嚟。」
親自將當地情況拍攝下來的阿Paul，帶回來一大堆照片，但拍照期間他仍十分克制，他說：「唔可以影得太多，因為咁樣好唔禮貌，亦都影唔到真實嘅嘢。其實去探訪，人與人嘅接觸最緊要，緊要過晒乜都大吹大擂，最重要係俾佢哋知道，一直有人關心緊佢哋。」
採訪、攝影：藍文浩