聯合醫院紀念成立35周年出咗本書，噚日舉行新書發佈會，八方喺會場居然見到好耐冇見嘅洪朝豐。豐豐個樣冇乜點變，依然係辮仔look。初時八方諗唔明豐豐同聯合有乜關係，後來佢上台致辭，先知道原來聯合幾乎係洪家救命恩人，所以佢要代表闔府向聯合講聲ThankYou。
洪朝豐話佢全家人都同聯合有深厚淵源，當年佢抑鬱狂躁症病發，口講就話用手指捽死人，實際上就四肢唔受控制，結果佢人生中第一次嘅五花大綁就獻咗畀聯合，因為醫護人員要綁住佢送佢入院，佢仲記得當時要勞煩囝囝幫佢除褲方便。
家姐係聯合藥房員工
患有老年癡呆症嘅洪朝豐媽媽亦係聯合病人，豐豐話有次佢去醫院探阿媽，向來講嘢唔清楚嘅媽媽忽然好似開咗turbo咁，說話連珠炮發，好彩醫生解釋係食藥後正常反應，否則嚇餐死。豐豐家姐就係聯合藥房員工，有次冠心病發作，心臟停頓5分鐘，多得聯合醫生用心臟除纖顫器搶救；仲有佢鍾意飲酒嘅阿哥，次次high咗都係送去聯合急救，所以聯合真係佢全家恩人。