陳慧琳（Kelly）當了媽媽後，有子萬事足，昨日她出席活動時，又歸心似箭，趕着回家，原來「蝦餃仔」劉昇打完預防針後發燒，搞到Kelly非常心痛，幸好老公提早回家照顧囝囝，Kelly才放心完成工作後，即飛奔回家湊B。
陳慧琳昨日出席在紅磡舉行的「好市民獎頒獎典禮2009年第二期」，擔任頒獎嘉賓，Kelly在現場提醒市民留意高清機頂盒騙案，頒獎禮上，Kelly還遇上她老公的朋友，她說：「我老公個friend都嚟攞獎，佢喺商場見到有人偷嘢，有槍佢都照追。」問Kelly見到賊會否幫手追捕？Kelly笑說：「我第一時間會大嗌，生得高音嘛，班多啲人一齊追，得我一個，仲要着住高踭鞋，應該唔係幾追到。」
歸心似箭
提到囝囝劉昇，Kelly即流露出一副慈母模樣，她透露囝囝打完預防針後發燒，Kelly說：「打完針就有發燒反應，噚晚成晚都冇乜點瞓，差少少就發高燒，如果一發高燒就要帶佢睇急症，好彩今朝起身，佢又識玩又識叫，就放心啲，不過頭先個陪月又打嚟話個仔又發燒，我做完嘢即係要返屋企，老公返咗去睇住囝囝。」Kelly今次提起個仔已經比上次堅強，談起打針時沒哭，但自己仍非常緊張，歸心似箭，她說：「我緊張到即刻打畀醫生，問點算，唉！次次打完針都會發燒，個心好痛，今次先打第二次，仲有好多支要打，個仔真係慘，心痛死我。」
不再爭獎
此外，問到Kelly是否仍舊不會出席各大頒獎禮，她坦承不會出席，會否宣佈不再攞獎？Kelly說：「咁又唔使咁刻意，不過我都有留意個樂壇。」問她睇好哪個？Kelly說：「都係陳奕迅、楊千嬅、容祖兒、謝安琪同張敬軒o架啦。」她坦言不參與頒獎禮心情輕鬆不少，不用爭也不用為衣着而苦惱。
採訪、攝影：胡比