出售波衫是球會收入來源之一，一支球隊，或者球星受唔受歡迎，波衫銷情會是重要指標。最近，曼聯又再次重提一年轉換一次主場波衫款式建議，希望藉此增加這方面的收入。
無論是英超、西甲或者意甲，大部份球會都採取每兩年換一次主、客場波衫款式政策，只有小部份是將第3作客波衫一年換一次。曼聯貴為全球最多球迷的英式足球球會，當然希望透過賣波衫增加收入，但一年轉一次主場球衣，不少紅魔球迷都持反對聲音，認為轉得太密，有搶錢之感覺，皆因現時的波衫款式設計上已經唔會有太大改動，如果一年轉一次，設計概念想有突破都幾難。
球迷要儲齊便得花錢
紅魔今季已經推出咗新「V」字球衣，但球迷可能只着一季，因為下季波衫胸口上面的贊助商標誌，亦會由現在的AIG，轉為另一間美國公司Aon，屆時曼聯又可以當新波衫賣，賺番一筆，但就苦了一班忠實紅魔球迷，又要掏腰包奉獻。
除了球會外，國家隊亦同球衣贊助商扭盡六壬，希望開拓波衫市場，尤其四年一度的世界盃決賽周這類大型賽事，怎會放過這個搵真銀機會；如A記最近為旗下贊助的國家隊包括阿根廷、日本同南非，推出普通版同窄身版波衫，球迷想將兩款都成為家中收藏品，無形中又要付出更多金錢先得到手。
文：戰鬥員A
本報名家
電郵：[email protected]
逢周二、五見報