羅霖今年初與丈夫劉坤銘舉家移居上海，昨日她回港出席Fendi初春時裝騷時，自爆早前上海家中收到恐嚇電話，勒索她數萬元。羅霖怕3名兒子出事，現在出入都十分小心，並要工人和司機保護，不過她不會請保鑣，怕保鑣會反綁架其小朋友。
意國品牌Fendi昨日在太古廣場舉行新店開幕，同場展示2010CruiseCollection，示範的名模包括AnaR.、Jocelyn及姚予晴，謝婷婷以嘉賓身份行騷，看騷的則有今年初與夫婿劉坤銘舉家移居上海的羅霖，此行她留港3天。
懷疑整車惹禍
羅霖早前表示仍未習慣上海的生活，更患上輕微抑鬱症，昨日她更自爆收到恐嚇電話，她擔憂地說：「一個月前工人收到電話，一個男人打嚟自稱知道我架車嘅車牌同牌子，要我入幾萬元去佢嘅戶口，我最怕小朋友有事，所以打電話問朋友好唔好報公安，我朋友就話可能係維修架車時啲人抄低咗我嘅車牌號碼，話內地好多呢啲騙局。」
驚保鑣變綁匪
羅霖續說：「家小朋友出入都要工人同司機跟實，好冇安全感。」問她可會請保鑣？她說：「都係一個好主意，但怕請保鑣反而會綁架小朋友。」
此外，問謝婷婷行騷可有底線，她說：「底衫褲唔得，比堅尼就俾人望住唔係太好。」聖誕將至，婷婷十分期待第一年與男友安志杰一起過，她說：「好期待，都有同公司提議放假，希望收到聖誕樹，我好鍾意聖誕節氣氛，加拿大有一個傳統，就係儲埋啲牙喺枕頭底，就會變錢，我收埋咗廿幾隻，但係家都冇錢。」
採訪：LawWaiMan
攝影：EdwardChou
