謝霆鋒同桂綸鎂噚日凌晨12點幾喺尖沙嘴為新片《綫人》試戲，兩個都扮賊，桂綸鎂平時斯文有氣質，估唔到染咗紅髮扮蠱惑女都似模似樣。至於留咗鬚嘅霆鋒一臉滄桑咁，扮積犯梗係入型入格啦。
市民圍觀似過年
場戲講佢哋回憶相識嘅經過，霆鋒俾警察追捕，咁啱好賭嘅桂綸鎂就喺大檔搶錢搞到畀蠱惑仔追殺，兩個喺尖沙嘴寶勒巷同加拿分道嘅三岔位，跑到索晒氣咁相遇，一啲都唔浪漫，但都唔易拍。
導演怕霆鋒揸車
因為要過咗12點先可以封路拍戲，所以場戲好夜先拍，霆鋒同桂綸鎂要跑超過100米後，咁啱撞到正，時間要捉得好準o架！由於現場好多人，扮警察同蠱惑仔嘅臨時演員都十幾人，記者又有半百，仲有爬高爬低睇拍戲嘅市民，同埋到場維持秩序嘅真警察，條街好似過年咁熱鬧。
霆鋒表現得好緊張，不時攞住對講機同啲工作人員討論情況，又因為好多途人用閃燈影相，佢同工作人員都大嗌叫人咪閃，卒之試咗四次先成功。但佢未埋位時心情都唔錯，飲嘢煲煙回下氣，有外籍人士盲舂舂走嚟問路，佢都指手畫腳好有心機教人行。導演林超賢話今次設計咗好多危險動作比霆鋒做，集中喺揸車戲，記得霆鋒曾經揸車撞親人，唔知今次會有乜戰車準備畀佢呢，林超賢話：「平常嘅車囉，我都好擔心佢揸車o架。」
