財政司司長曾俊華會喺十一月二十七日星期五上午十一時三十分到中文大學，出席新亞書院雙周會，發表演講，講題係有關下年度財政預算案的想法，欲知曾司長有何想法，到中大邵逸夫堂一聽，便知究竟。每年呢個時候係財爺徵集各方意見嘅時段，多聽少講，但曾司長今次到新亞雙周會，特別講ThoughtsAboutTheComingBudget，有啲新聞性噃。
新亞書院慶祝創院六十年，舉辦一連串活動，已近尾聲，高潮將至，十一月十四日及十五號，校友在大會堂音樂廳演出話劇《珍重星光》，廿七日請財政司司長演講，廿八日舉行校友日，不少海外校友回來參加，到咗廿九日，就係院慶晚宴，在會展舊翼舉行，全場開盡八十六席，會展方面話再加席嘅話，廚房就支持不住了！因為舊翼廚房不比GrandHall廚房咁大也。校友尊子會在開席前為校友即席揮毫，描繪肖像，最低收費一百元（捐畀新亞），最高收費可以無限大，點都係送晒畀母校嘅啫，相信到時必定畫到尊子手軟，校友要提早到場排隊至得。
壓軸好戲就係十二月一日，請中大校長劉遵義主持最後一場院慶學術講座，用英文講TheRiseofNewAsia（新亞的崛起）。劉校長係研究東亞經濟嘅專家，在呢方面發表過數以十計嘅論文，在一九九七亞洲金融風暴之前，已發表文章指出亞洲經濟危機所在，後來證明係「一矢中的」，去年十二月在新城財經台經濟峯會演講，話明中國保八冇問題，中國好，香港唔會衰，又在去年十二月嘅中大校友日時以「天不會塌下來」為題，指出大家唔好太悲觀。一年快過，信劉校長在年中入市者，今日應該大有收穫。但校長唔係股神，唔係股評人，只係睇慣世界經濟大勢，點出要害啫。今次佢為新亞院慶演講，以TheRiseofNewAsia為題，語帶雙關。新亞書院之名為「新亞」，據唐君毅先生講新亞就係新亞洲嘅意思。唐先生在1952年指出，古老的中國，古老的亞洲，必須新生，只有古老的中國獲得新生，中國得救，亞洲得救，而後世界人類才真能得救。唐先生講的是文化精神，相信劉校長會講的，是經濟實體，好值得一聽。