袁詠儀（靚靚）由影圈暴躁女星，變成電視圈的辣媽。眼大多表情兼瞪人，靚靚直認令她雙眼多紋，現時內外兼護，外在小心按摩護理，內在受老公感染，多看書多聽歌，打開心扉吐心事，力求心慈貌美。
袁詠儀眼大精靈，她早前試用Lancome新推出的Genifique嫩肌活膚眼部精華露，分享護眼及美容心得。她說：「我對眼幾大，講嘢又多表情，一瞪眼又惡死，真係對對眼嘅破壞都強啲，所以好容易有細紋，我眼部落妝會落兩次，又會成日用eyecream，好講究o架。」
用Cream狀面膜
對於臉容護理，靚靚則表示不一定買名貴護膚品，最愛試新product，特別鍾情溫和無味的，間中更會用蛋白、青瓜敷，她說：「成塊面就懶啲，早晚用半個鐘頭護膚，拍戲如果超過4場戲，先會敷mask，唔想太密，喺屋企就鍾意用cream狀嘅，費事行來行去怕跌落嚟。」
被稱為靚靚，她認定靚是有層次，她說：「外在只係其中一個因素，靚唔使好盡，太靚會over，我覺得靚應該係乾淨、整齊，尤其現時，整容氣候充斥，天然先係最美。」她謂不介意整容，但時刻提醒自己盡量不好整，因為心好，自然樣靚。
兒子遺傳愛飲湯
靚靚表示這方面受到老公影響，她說：「俾老公感染，睇多咗書同埋同個仔一齊聽多咗音樂。以前有乜事會收收埋埋，家會願意同朋友傾偈，將個心打開，咁會好啲，冇以前咁偏激，以前暴躁發脾氣，真係紋都多啲，家就心境平和啲。」
多休息、多飲湯水都是老生常談，只戒牛肉，不偏吃肉不偏吃菜的靚靚，感激媽媽的百變靚湯，她說：「媽咪成日煲好多青紅蘿蔔、粉葛、赤小豆，乜都有，個仔都遺傳咗我鍾意飲湯，成日都飲到雪雪聲，所以皮膚都幾好o架。」
採訪：LawWaiMan
攝影：EdwardChou
化妝：佩佩
髮型：VicKwanofHairCulture
保靚眼
3招刺激眼部穴位及通淋巴：
1.按—在眼角、眼中、眼尾按壓三次〈圖左〉
2.掃—由眼角、眼中、眼尾掃向太陽穴〈圖右〉
3.圈—用小棒沿着全個眼部打圈
