上星期《蘋果》報道拔萃仔報答恩師Lowcock嘅事，關於呢件事，不得不提立法會議員張宇人。張宇人噚日同八方講，八十年代初佢係舊生會主席兼校董，知道Lowcock有病要退休後，雖然好唔捨得，但都無奈接受。83年初，Lowcock喺早會宣佈退休當日，佢特別返學校以示支持，當校長宣佈令人震驚嘅消息後，佢陪Lowcock返回校長室，「佢好depress，十分唔開心。」
張宇人話由於未見過Lowcock情緒咁低落，心知不妙，果然Lowcock有話要說，「佢話自己一毫子都冇，退休後連住嘅地方都冇。」張宇人話知道校長一直慷慨幫助學生，但估唔到佢竟然一貧如洗，「我就問佢，介唔介意我話畀人知你冇錢，因為咁先可以幫你籌錢。」張宇人指Lowcock向來只會幫助學生，老來反要學生籌措生活費，心情可想而知。
神秘舊生配對捐款
結果Lowcock面對現實，張宇人包辦籌款重任，火速決定在名下酒樓海洋皇宮舉行籌款晚宴，筵開100席，由舊生會贊助食物成本，所以不用扣除成本共籌到24萬元。張宇人笑言，募捐過程中才發現Lowcock對學生真係有求必應，難怪冇錢剩。「好多人都受過佢恩惠，呢個就有對釘鞋，嗰個就有羽毛球拍，真係乜都有。」佢噚日猛話自己當年死蠢，唔識得開口要校長買對釘鞋畀佢，「我想買對50蚊Adidas釘鞋，老竇都要幾個月後先買畀我。」
一班拔萃仔為咗畀Lowcock有一個家，集腋成裘，張宇人噚日透露，其實背後仲要多謝一個舊生，事緣當年發起籌款活動後，有個舊生同佢講，「你籌到一蚊，我match一蚊。」呢個咁慷慨嘅舊生，願意一對一配對捐款，條件係唔可以向外公開佢姓名，所以張宇人點都唔肯透露係邊個。
物業持有人非校長
籌款晚宴加埋其他捐款，舊生會共籌到60幾萬元，連同上述舊生一對一捐款，總共幫Lowcock籌到逾120萬元，為校長退休有其居夢想成真。張宇人話最初以為佢會選擇喺男拔附近一帶，「返嚟學校開飯都方便啲。」點知佢卻鍾情西貢，一住廿幾年。
Lowcock喺西貢頤養天年，有舊生透露，間屋現由三人聯名持有，並不屬於Lowcock名下；Lowcock無解釋原因，估計可能當年佢認為自己病重，所以有此安排。
幫退休校長籌錢真係百年一遇，張宇人噚日講笑，當時都覺得好突兀，「我記得女拔萃個校長好似都要退休，人哋個校長唔使擔心生活，唔知點解我哋個校長就咁鬼窮。」張宇人又話，應該唔使為現任男拔校長張灼祥操心退休生活，但承諾退休時，會送一支筆同一隻手錶畀佢，「佢成日隨手拎自己支筆、自己隻錶出嚟拍賣籌款，所以要送番畀佢。」
鐵騎英姿萬人迷
受無數學生擁戴嘅Lowcock校長終身未娶，不過唔好以為佢係男校毒男無人吼，不受女性歡迎，實情後生時嘅Lowcock韻事不少，男拔生口耳相傳，傳誦至今。
年輕經常蒲酒吧
據講Lowcock有一段日子揸電單車代步，鐵騎英姿令正值青春期嘅中學生趨之若鶩，當正佢係偶像，要迷倒女性更加容易，八方聽聞唔少拔萃仔都在學校內見過Lowcock與異性一齊，至於點解始終唔能夠開花結果，就真係一個謎，除咗Lowcock，可能無人解得開。
因肝病退休嘅Lowcock，年輕時經常蒲尖沙嘴酒吧，張宇人話有時見到校長飲到醉醺醺返學校㖭，大家都唔覺得有乜大不了。今時今日，八方聽到直情覺得匪夷所思，如果家有校長俾學生見到買醉，第二日已經唔使返工啦，真係今時唔同往日。張宇人話Lowcock病後已戒烈酒，近年可飲紅酒，平貴不拘，但只限酒精含量12%以下，聊勝於無。
mailto:[email protected]