古天樂近年主演嘅電影叫好又叫座，片約一部接一部，接戲都接到手軟，可謂豬籠入水，早前佢同台灣女星徐熙媛（大S）因拍攝電影《保持通話》而傳出緋聞，雖然佢哋齊聲否認撻着，不過佢哋接二連三合作拍戲，而且每次出席公開場合又表現避忌，所以令緋聞傳個不停。
最近馮仁昭仲收到風，古仔同大S繼合拍《大內密探靈靈狗》後，將會再結片緣合演迪士尼投資近4,000萬嘅新片《魔法小葫蘆》，令人揣測會唔會係古仔向片商推薦緋聞女友大S做主角，相信到時佢哋嘅緋聞又會傳到熱烘烘。
其實《魔》片係改編自中國著名兒童文學家張天翼嘅童話《寶葫蘆的秘密》，早喺07年已經拍成電影，當時梁詠琪仲有份演出，今次古仔就會夥拍大S同蔡卓妍合拍《魔》片，主要係針對東南亞市場，電影預計喺明年4月開拍，並會由梁柏堅執導。
簽定保密協議
因為迪士尼一向要求嚴謹，所以眾人事前都簽咗保密協議，唔會向外間透露電影嘅詳情，據知今次電影會加插好多特技場面，所以喺投資預算上亦會相對增加。而首次主演這類型電影嘅古仔，相信會帶畀觀眾一定嘅驚喜。