商台叱咤頒獎禮記者會昨日在九龍灣舉行，出席歌手包括陳奕迅（Eason）、容祖兒和謝安琪（Kay）等。謝安琪表示今年女歌手獎看好祖兒，男歌手則睇好Eason，事後她補飛說老公張繼聰的歌曲在家中播放率最高。
陳奕迅、古巨基、容祖兒、謝安琪、楊千嬅、方大同和蔡卓妍等，昨日在九龍灣出席「09年度叱咤樂壇流行榜頒獎典禮」記者會。男歌手金獎激鬥落在Eason、古巨基和方大同身上，問Eason有否信心在上年金獎得主方大同手上取回金獎？他反問記者說：「今年邊個最勁？我真係冇留意。」記者表示雖然方大同走勢不俗，但不及他好，Eason笑說：「方大同好呀，但未到最後一秒都唔知。」
加盟新唱片公司的基仔指今年出了兩張唱片，一隻屬於舊公司，另一隻是新東家所出，問他會否擔心舊公司不為他爭取獎項？他說：「一年做嘅嘢係累積返嚟嘅，唔係爭唔爭，我冇向公司施壓力。」
祖兒睇好自己
上年叱咤男歌手金獎得主方大同卻坦言沒信心冧莊，因今年只出了翻唱碟，他說：「翻唱歌唔係頒獎禮嘅嘢。」會否視Eason為勁敵？他強調沒有敵人。
女歌手方面，今年仍是祖兒和Kay的天下。Kay看好祖兒得獎。她又力撐傳緋聞的Eason歌曲好聽，且是最頑強的男歌手。記者笑她不撐老公張繼聰，她即說：「我老公9個月冇派歌，咁累積播放率一定係Eason，屋企嘅播放率就係張繼聰高好多。」
祖兒則表示沒想過冧莊問題，但她也看好自己及蔡卓妍，她說：「自己唔對自己有信心，邊個對我有信心。」
採訪：馬建華、李珮洳
攝影：陳順禎、馮嘉文
人靠衣裝：Eason祖兒先贏衣着
未鬥得獎感受、未鬥眼淚流得多真情假意，昨日一眾歌手出席叱咤頒獎禮記者會，先禮後兵例牌玩咗至講，論昨日各歌手隨心衣着，先贏一仗的男女得主都是企中間位的Eason與祖兒，前者繼續是「娛樂大家」的大娛樂家，衞衣低浪褲已是他的secondskin，冇人夠他砌。祖兒的黑色小斜裙及鮮紅chunky鏈，唔使多，夠贏！撰文：娜娜