香港出色多隱形富豪，新聞周不時都講，喺街執紙皮都有幾千萬身家；估唔到熱刺就好似英超嘅隱形富豪。熱刺周二公佈最新嘅財政報告，原來佢哋喺之前16個月內，喺轉會市場嘅支出高達1.5億鎊（約19億港元），比英超「Big4」都要高，只係僅次於中東大水喉撐腰嘅曼城。唔好以為熱刺淨係識使錢，原來佢哋上年度除稅前盈利高達3,340萬鎊（約4.3億港元）；報道更指出，如果熱刺今季頂得住攞到前4名，來季可以參加歐聯，盈利更有機會跳升到3億鎊（38億港元）。講英超戰績，熱刺似乎及唔上車路士同阿仙奴，但論「吸水」能力一啲都唔差o架！