皇家馬德里季初就好似銀河艦隊番晒嚟咁，點知呢排越踢越沉，畀過唔少蕉皮球迷踩，結果周二場西班牙盃第4圈次回合，主場對住丙組仔艾高干只贏1:0，兩回合計輸1:4出局，同賽前轉盤嘅馬會齊齊「跣」捧場客一鑊。
足智彩[-1][-2]轉到你暈
呢場波開賽前，足智彩已先「跣一跣」球迷，星期一開盤，皇馬個「讓球主客和」係讓[-1]，但到晚上8時突然轉去[-2]，不過兩個鐘後又變番[-1]。我求大俠賭波都有幾年，「讓球主客和」個讓球數會變，就真係極之罕見，原本家家有求，轉盤都唔係問題，但足智彩轉皇馬[-2]時，又冇將賠率變動，「主勝」維持1.28倍。嘩！原本皇馬贏2:0就收錢嘅「主勝」，家要3:0先贏，難度高咗又冇好分到，好搵笨啫！馬會公關大員就話，「讓球主客和」更改讓球數非常罕見，叫球迷要留意臨場賠率變動；你係莊我係閒，又有咩辦法。
原本睇埋皇馬個出場陣容，其實[-2]時買「主勝」嘅球迷，都唔係好驚，卡卡、魯爾、雲佬、希古恩等主力全部正選；皇馬球迷認真唔話得，對丙組仔都有7.9萬人入場，而且觀眾席星光熠熠，周六將作客西班牙踢友賽嘅阿根廷，教練馬勒當拿同隊長馬斯真蘭奴，帶埋隊友入巴拿比奴入場，仲有AC米蘭嘅柏圖亦坐喺席上捧師兄卡卡場。
球迷狂叫比歷連奴下台
點知皇馬打落完全唔對辦，上半場俾艾高干悶和0:0，下半場教練比歷連奴諗住搏殺，換埋雲達華治同馬些路入嚟，結果都係靠雲達華治81分鐘入球，小勝1:0，追唔番首回合輸4蛋嘅失地，俾丙組仔淘汰。賽後就有皇馬球迷高呼「比歷連奴下台」長達15秒，睇嚟呢位智利教練喺皇馬個位置都危危乎。
皇馬小勝1:0，無論球迷喺[-1]定[-2]時買「主勝」都開唔出，到底喺「和局」定「客勝」，就要睇你幾時買，唉！下次買波除咗睇賠率，仲要睇埋個讓球數呀。