興建高鐵，似勢在必行，再拖落去就只會將成本推高又推高。有人覺得睇CPI（消費物價指數）根本係好平穩嘅啫，通脹未曾見到，點解啲建築材料與建築費會越來越貴，仲唔係奸商謀取暴利？
建築邦就曾經向左丁山解釋，全世界政府一齊印銀紙刺激經濟，而採用嘅方法，全部一樣，就係興建鐵路、公路、水庫、電站、風力發電、機場、地鐵等等，建築材料生產商本已陷入衰退邊緣，開除工人，突然之間，訂單湧到埋嚟，邊度開工開得切呀，原材料去邊度搵齊呀？最佳之應付方法就係加價，加價之後仍然應付唔到突如其來嘅強大基建需求，唯有再加價。照計，咁好景，可以吸引新投資，擴建工廠嘅，但唔係噃，投資者點知道政府一旦退市，局面又會變成點呀？一旦投下大量資金，生產建材，而各國基建完成之後，無以為繼嘅話，工廠產能過剩而市場縮減，廠商投資咪凍過水？所以建築邦話：「十餐飯最好分開十晚食，平平穩穩，大家可以吃得溫飽安樂。但十餐佳餚一齊推埋嚟，要一晚食晒，好難啃嘅啫，飽死之後，幾驚聽晚廚房冇米落鑊！」
講乜都好，大家有飯食之時，就唔鍾意俾人騷擾。報紙話未來幾年，高鐵開工嘅話，西九龍以至大角嘴嘅豪宅漾日居、擎天半島、凱旋門等總共六十五座商廈，會完全受到建築噪音影響，直至二○一五年！噪音會高達七十六至七十八分貝，英華書院極受影響。嘈成咁，居民肯定會向環保署投訴，唔通到時環保署會申請禁制令，唔准港鐵開工？呢啲頭痛問題不知如何解決。
《經濟學人》（上星期）有一篇報導指出，在經濟低迷，失業率攀升嘅情況下，美國人與歐洲人已逐漸失去環保熱情，對氣候轉變之說產生懷疑，美國人相信全球暖化者，由08年4月之71%跌到近月之57%，相信「暖化論或氣候變化論」嘅人士，主要係民主黨內自由派（liberals）及30歲以下嘅年青人。講求環保嘅澳洲，相信暖化論而又肯承擔成本嘅比例，由06年嘅60%下降至今年嘅48%，英國方面，人民最唔接受top-down（上頭指令）嘅環保政策（特區政府嘅慳電膽政策就係top-down典型），據《經濟學人》報導，一言以蔽之，歐美英澳人民家關注經濟多過重視排放與暖化！