跟國策炒股，勝算已有一半，起碼有買貴冇買錯。金融海嘯以來為谷內銷，有家電及汽車下鄉，兩個板塊由年頭到家，無論喺邊個位買都冇錯，不過投資者往往等到價又唔敢買，因為個市估值實在太高，現時恒指市盈率24倍，已處於過去5年最高，亦因為市場對公司盈利前景審慎咗，今時今日嘅PE竟然高過07年高位（21.4倍）！唔止散戶，就連基金都開始出現PanicBuying，估值遲啲再諗，只要風向不變，即使係過山車式360度震倉，總好過冇貨喺倉。
要確保借到東風，國際大形勢不能不睇。下周全球焦點係美國空軍一號將劃破中南海長空，帶來奧巴馬首次官式訪華。一如平時溫爺爺四處視察民情，去到邊間，邊間股價例升，可惜溫爺爺行程係國家機密，冇得跟住炒。呢次奧巴馬就唔同，事前張揚會傾人民幣升值、新能源、貿易等問題，最大懸念係雙方會向對方送乜禮？
有發展就有樓炒
早前中央已送出上海迪士尼，預計整個計劃會用200億元人民幣。奧巴馬咁識搞公關，相信梗會醒番啲當回禮。佢最愛新能源，早前已傳有美國巨企打算喺江蘇一帶起大型光伏企業，到時睇奧巴馬言論，應會聽到啲貼士，到底係開太陽能、電動車、鋰電、風水電、智能電網，定係其他瓣數。
無論開邊瓣都好，江蘇沿海一帶將成新能源重地呢點越嚟越明顯。中國風能協會表示，未來包括江蘇沿海在內的5個地區，將打造江蘇沿海風電「海上三峽」。有風亦有太陽，目前全球20%光伏產能都集中喺江蘇無錫，以美國上市嘅尚德為龍頭。
附近嘅鹽城將成為全國重點新發展區，早前單係一個經貿洽談會就傾咗65億美元生意番嚟。有發展就有樓炒，正喺鹽城起緊樓嘅寶龍地產（1238），剛動工的地盤預期總面積48萬平方米，經營模式係有樓賣又有商場收租，仲有酒店提供穩定現金流。負債低嘅寶龍版圖喺晒呢頭，上至煙台青島，下至蘇州無錫，入至蚌埠都喺晒佢手。回顧美國經驗，矽谷係美國房價最高地區，中國矽谷就在蘇州，炒新能源，其實買地產股一樣得。
胡孟青